प्रधानमंत्री नरेन्द्र मोदी मिथिला क्षेत्रीय झारखण्डक उपराजधानी दुमकामे एकटा चुनावी जनसभाकेँ सम्बोधित करैत झारखण्डमे झामुमो-कांग्रेस-राजद सरकारपर घृणा आ साम्प्रदायिक एजेण्डाकेँ बढ़ावा देबाक आरोप लगओलनि।
ओ कहलनि जे झारखंड पहिल राज्य अछि जतयसँ लव जिहाद शुरू भेल। ई शब्द झारखण्डक लोक देलक अछि। अङ्ग्रेजक समयसँ दू सय वर्षसँ देशमे रविदिन कऽ छुट्टी होइत रहल अछि। ई ईसाई समाजसँ जुड़ल अछि। मुदा, ई लोकसभ संथाल परगना जिलामे रविदिनक बदला शुक्रदिन छुट्टी लागू कयलनि। अर्थात, पहिने हिन्दूसँ झगड़ा आ आब ईसाई लोकनिक सङ्ग झगड़ा। ई हुनकर साम्प्रदायिक राजनीतिक एकटा खतरनाक उदाहरण अछि। मोदी हुनकर नफरती प्रोपगेंडा विफल कय कऽ रहत।
पीएम मोदी कहलनि कि झारखण्डमे एकटा पैघ संकट घुसपैठियाक बनि गेल अछि। हमर संथाल परगना तऽ घुसपैठियाक एकटा पैघ चुनौतीक सामना कय रहल अछि। परिणाम की अछि ? कतेको क्षेत्रमे घुसपैठियाक संख्या बढ़ि रहल अछि आ आदिवासीक संख्या घटि रहल अछि। घुसपैठियाक कारण एतय केर बेटीक जान खतरामे अछि। ओ आदिवासी जमीन हड़पि रहल अछि। बेटीकेँ ५०-५० टुकड़ा कय हत्या कयल जा रहल अछि। केकरो आगिमे फेंकल जा रहल अछि, तऽ केकरो जीभ खींचल जा रहल अछि।
ओ कहलनि कि, जे आदिवासी बेटी सभकेँ निशाना बनबैत अछि ओकरा एतय केर झामुमो सरकार द्वारा पोषित कयल जा रहल अछि। इंडी गठबंधनपर हमला करैत ओ कहलनि जे हुनकर फार्मूला अछि कि घोर साम्प्रदायिक राजनीति करब, तुष्टीकरण करब आ अलगाववादीकेँ सुरक्षा देब।
