महाकवि कालीदास अपन महाकाव्य ‘कुमाससंभवमे’ लिखने छथि – “त्रेतायां मंत्र शक्तिश्च, ज्ञान शक्ति कृते युगे। द्वापरे युद्ध शक्तिश्च, संघै शक्ति: कलियुगे।” मिथिला नवजीवन समिति ट्रस्ट, अपन सैकड़ों सदस्य एवम् शुभचिंतकक सहयोगसँ अविस्मरणीय स्वर्ण जयंती समारोह आयोजित कय संगठन शक्तिक सर्वश्रेष्ठ उदाहरण समाजक समक्ष प्रस्तुत कयलक। कोनो भी संगठनक अनवरत् चलैत आबि रहल जीवंत गतिविधि समाजक मध्य सकारात्मक संदेश निर्गत कराबैत अछि। मिथिला नवजीवन समिति ट्रस्ट एकर प्रत्यक्ष उदाहरण अछि। ट्रस्ट १९७५ ईस्वीसँ मुंबई प्रवासी मैथिल समाजक एहेन संगठन अछि जाहिमे अनेकों सामाजिक कार्यकर्ता, अनेकों क्षेत्रमे अपन ज्ञान-विज्ञान द्वारा सम्मान प्राप्त केनिहार समाजसेवी एहेन सामाजिक संगठनक सेवाधारी बनबाक सौभाग्य प्राप्त कऽ चुकल छथि। वर्तमानमे ट्रस्ट २२ सदस्यीय कार्यकारिणीक बदौलत स्वर्ण जयंतीक आयोजन कय जगजियार भेल।
मिथिला नवजीवन समिति ट्रस्टक सचिव विमल कुमार झा, मैपुप्र केर समदियाक संग वार्तालाप करैत जनतब देलनि जे ई आयोजन निश्चित रूपें चुनौती छल। मुदा अध्यक्ष प्रेमचन्द्र झा (प्रेमजी) समेत कार्यकर्ताक बदौलत चुनौतीपूर्ण कार्य हल्लुक होइत गेल। फलत: त्रि-दिवसीय स्वर्ण जयंती समारोहक आयोजन भव्यताक संग निर्विघ्न सम्पन्न भेल। अतिथि सत्कारक अवसर पर उपस्थित जनमानसकें सम्बोधित करैत विमल कुमार झा बतौलनि जे “मिथिला नवजीवन समिति ट्रस्टक कार्यकर्ता हेबाक गौरव बोध भऽ रहल अछि। हम विगत् 28 वर्षसँ सचिवक वा वरिष्ठ पद पर सेवा प्रदान कऽ रहल छी। एहि दरम्यान ट्रस्ट द्वारा जतेक सम्मान तथा सहयोग प्राप्त भऽ रहल अछि तकर बखान करबाक लेल शब्द नहि अछि।” उपस्थित अतिथि स्वागत आ अभिनंदन करैत आऔर ट्रस्टक पूर्व दिवंगत अध्यक्षकें भावभीनी श्रद्धांजलि देलनि।
ट्रस्टक अध्यक्ष प्रेमचन्द्र झा (प्रेमजी) अपन संबोधनमे उपस्थित अतिथि-अभ्यागतकें स्वागत करैत अभिनंदन कयलनि। पूर्व दिवंगत भऽ चुकल अध्यक्षक प्रति श्रद्धापुष्प समर्पित कयलनि। दू दिनक शास्त्रोक्त विधिनुसार सहस्र चंडी महायज्ञक आयोजन सरस्वती मंदिरक प्राङ्गणकें भक्तिक आवरणसँ आच्छादित कऽ देने छल।
स्वर्ण जयंती आयोजनमे समाजक विशिष्ट महानुभावकें परम्परागत स्वागत-सम्मान कयल गेलनि। मंचक संचालन कुशल वक्ता भागवत सेवा संस्थानक अध्यक्ष तथा मैथिल समन्वय समितिक वरिष्ठ पदाधिकारी ऊर्जावान धनंजय झा द्वारा कयल गेल।
तेसर दिनक कार्यक्रममे सभक नजरि अटकल छल मिथिलाक बेटी स्वर कोकिला मैथिल ठाकुर द्वारा सांस्कृतिक कार्यक्रम सुनबाक लेल। ख्यातिप्राप्त अन्तरराष्ट्रीय मंच संचालक पं कमलाकांत झा द्वारा उपस्थित जनसमुदायकें अनेकों तरहें हास-परिहासक चासनीमे डूबाय तथा मैथिली ठाकुरक धारावाहिक संगीतक प्रस्तुतिसँ उमड़ल जनसमुह टससँ मस नहि भेलाह।
एहि स्वर्ण जयंती महोत्सवक सरस्वती पूजनोत्सवक तेसर दिन सायंकाल विशाल महाभंडाराक आयोजन भेल। अनुमानत: १०,००० सँ बेसीक संख्यामे लोक महाभंडाराक आनंद लेलनि। मिथिला नवजीवन समिति ट्रस्टक पदाधिकारी यथा ललन कुमार सिंह, प्रमोद कुमार कर्ण, कुबेर कुमार ठाकुर, जय किशोरी झा, महानन्द झा, नवीन कुमार मिश्र, आनन्द कुमार झा, मुकेश कुमार झा, उज्जवल झा, सुजीत झा, मुनीन्द्र झा, प्रकाश झा, नरसिंह भगत, कौशल कुमार झा, विपिन चौधरी, राजेश कुमार झा, अमर झा, नारायण झा, संजय कुमार झा, विजय चन्द्र झा आदिक अहर्निश योगदान समारोहके सफलतामे चारि चान्द लगौलक। अंतमे सचिव विमल कुमार झा समस्त सहयोगी व सदस्यगणके सहयोग देबाक लेल धन्यवादक संग आभार प्रकट कयलन्हि।
