उल्लासनगर स्थित मिथिला नवजीवन समिति ट्रस्टक आमसभा पूर्व निर्धारित समयक मुताबिक दिनांक १३ अक्टूबर, २०२४ कें सफलतापूर्वक सम्पन्न भेल। जाहिमे वर्ष २०२३-२०२४ केर वार्षिक आय-व्यय बैलेंस सीट सभाक समक्ष प्रस्तुत कयल गेल। प्रस्तुत कयल गेल आय-व्यय ब्यौराकें उपस्थित सदस्यगण द्वारा ध्वनिमतसँ पारित कयल गेल।
आमसभामे ट्रस्टक स्वर्ण जयंती आयोजित करबाक प्रस्ताव सचिव विमल झा द्वारा प्रस्तुत कयल गेल। जाहिकेँ सर्वसम्मतिसँ आमसभामे प्रस्तुत प्रस्तावके करतल ध्वनि द्वारा पारित कयल गेल। कार्यकारिणी समिति द्वारा पूर्ण उत्साह एवम् समर्पणक संग स्वर्ण जयंती धूमधामसँ आयोजित करेबाक संकल्प लेल गेल।
सचिव द्वारा सम्पूर्ण कार्यक्रमक जानकारी मैथिल पुनर्जागरण प्रकाश केर प्रतिनिधिके उपलब्ध कराओल गेल अछि। ताहि अनुसार आमसभामे ट्रस्टसँ संबंधित अनेकों महत्वपूर्ण विषय पर विस्तृत चर्चा कयल गेल जाहिमे मुख्यत: आगामी वर्ष अर्थात २०२५ ईस्वीमे अपन स्थापनाक स्वर्ण जयंती अर्थात पचासम् वर्षगांठ प्रमुख छल। जनतब जे मिथिला नवजीवन समिति ट्रस्ट अपन स्थापनाक उपरांत गौरवमय यात्रा करैत अनेकों सामाजिक, सांस्कृतिक तथा लोककल्याणकारी कार्यक्रमक माध्यमें समाजक समक्ष स्मरणीय उदाहरण प्रस्तुत करैत आबि रहल अछि। ट्रस्टक अध्यक्ष प्रेमचन्द्र झा आमसभामे मिथिला नवजीवन समिति द्वारा कयल गेल कार्यक उल्लेख करैत सभक सहयोग लेल आभार व्यक्त कयलनि।
आमसभामे पेट्रोन सदस्य एवम् लब्धप्रतिष्ठ समाजसेवी समेत अनेकों वरिष्ठ महानुभाव उपस्थित छलाह। जाहिमे डाॅ. संदीप झा, डाॅ. सुनील झा, श्रीमती इन्दू झा, जयमाधव झा, ललन सिंह (कोषाध्यक्ष, मिथिला नवजीवन समिति ट्रस्ट), प्रमोद कर्ण, महानन्द झा, उज्जवल, मुकुन्द, मणिकान्त झा, मुकेश, सुजीत, बिपिन, कुबेर ठाकुर, प्रकाश, आनन्द, पंकज झा, शिवानंद मिश्र, प्रमोद झा, राकेश कुमार झा, दिलीप मिश्र, आलोक कुमार झा तथा ट्रस्टक समर्पित पदाधिकारी समेत अनेको सदस्य उपस्थित छलाह।
