बनगाँव (सहरसा) निवासी अनेक सामाजिक गतिविधिमे सम्मलित डाॅ. विनय कर्ण सोमकेँ मैथिल पुनर्जागरण प्रकाश फोरम केर मधुबनी युनिटमे चर्चाक लेल उपस्थिति देलनि। एतय अजय नाथ झा शास्त्री हुनका मिथिलाक परिधान पाग-दोपटा आदिसँ सम्मानित कयलनि।
जनतब जे डाॅ. विनय कर्ण मिथिलाक्षर साक्षरता अभियानक संरक्षक छथि, मैथिली अखबार ‘मैथिल पुनर्जागरण प्रकाश’ समेत एहि मैथिल पुनर्जागरण प्रकाश फोरम’क सेहो संरक्षक समेत स्थायी सदस्य ओ अभिन्न अंग छथि। आर अनेक सामाजिक गतिविधिमे ई सक्रिय रहैत छथि।
जनतब जे ई फोरम एखनि अपन अनेक उपक्रम सभमे गति देबाक लेल प्रयास तेज कयने अछि आ ताहि लेल एकर सदस्य सभसँ लगातार चर्चाक दौर जारी छैक, ताहि क्रममे सोमकेँ डाॅ. विनय कर्ण फोरमक मधुबनी कार्यालय पहुँचलाह आ अजय नाथ झा शास्त्री समेत उपस्थित सदस्य सभसँ फोरमक विषयमे कतेको तरहक विचार-विमर्श भेल।
डाॅ. विनय कर्ण कहलनि, “निश्चित रुपसँ ई फोरम मिथिला-मैथिलीक जड़ि मजबूत करैत अस्तित्व संरक्षणक काज कऽ रहल अछि। ताहि क्रममे एकर उपक्रम मिथिलाक्षर साक्षरता अभियान, मैथिली अखबार ‘मैथिल पुनर्जागरण प्रकाश’, ‘मिथिलाक पहिचान मिथिलाक्षर निशान’, पुनर्जागरण शिक्षण-प्रशिक्षण संस्थान, सांस्कृतिक संरक्षण पुनर्जागरण अभियान, शत-प्रतिशत शिक्षा अभियान आ मैथिलीक जड़ि मजबूत करय केर अभियान सभटा उपक्रम एक पर एक अछि आ जड़ि केर मजबूत करय केर दिशामे एकर साधल डेग निश्चित रूपसँ गंतव्य दिसि बढ़ि रहल छैक आ हमरा लोकनि एहिमे गति देबय केर भरपूर प्रयास करब।”
