बिहारक मुख्यमंत्री नीतीश कुमारक एकटा मंत्री आ जदयू नेता बृहस्पति दिन एकटा बयान देलनि जे भाजपाक अनुकूल नहिं अछि। राज्यक अल्पसंख्यक कल्याण मंत्री मोहम्मद जमा खान कहलनि जे जँ नीतीश कुमार बिहारमे भाजपाक संग नहिं रहितथि तँ लोकसभा चुनावमे एकटा सीट जीतब कठिन भऽ जाइत। खान कहलनि जे बिहारक जनता नीतीश कुमारक चेहरा पर भरोसा करैत अछि। ओ कहलनि जे २०२५ मे बिहार विधानसभा चुनावक बाद सेहो नीतीश कुमारक नेतृत्वमे सरकार बनत।
जमा खान नीतीश कुमारक प्रशंसा करैत कहलनि, “जँ नीतीश कुमार भाजपाक संग नहिं होइतथि तऽ भाजपा शून्य पर आउट भऽ जाइत । बिहारक जनता नीतीश कुमारक चेहरा पर भरोसा करैत अछि। केंद्रमे जे सरकार बनल अछि ओ नीतीश कुमारक समर्थनसँ बनल अछि। ओ समझौता कयने छथि। नीतीशक सभ समर्थक चाहैत छल जे ओ प्रधानमंत्री बनथि मुदा ओ केंद्र सरकार बनेनाइ जरूरी समझलनि। नीतीश कुमारक नेतृत्वमे केंद्रमे एनडीए सरकार बनल, जखन कि लोक की-की बात कऽ रहल छल। बिहारमे सेहो २०२५ मे नीतीश कुमारक नेतृत्वमे सरकार बनत।”
बिहारमे पीएचईडी विभागमे ३५० निविदा रद्द करबा पर मंत्री जमा खान कहलनि कि नीतीश कुमारक सरकारमे भ्रष्टाचार बर्दाश्त नहिं कयल जाइत अछि। ओ कहलनि कि, कियो गड़बड़ करयवाला होय, तऽ ओ कतेक प्रभावशाली होइथ, ओकरा छोड़ल नहिं जायत। ओ कहलनि जे विभागमे भेल अनियमितताक समीक्षा कयल जा रहल अछि आ जँ किछु गलत भेटैत अछि तँ कारवाई कयल जायत। बतबैत चली जे महागठबंधन सरकारक दौरान भेल लोक स्वास्थ्य यांत्रिकी विभाग (पीएचईडी) मे ८२६ करोड़ रुपयाक ३५० टेंडर रद्द कय देल गेल अछि। ई निविदा ग्रामीण जल आपूर्ति प्रणालीक लेल छल आ आब एकरा नव रूपसँ आमंत्रित कयल जायत।
