पाकिस्तानमे बलूच लिबरेशन आर्मी मंगलदिन सैकड़ो यात्रीकेँ लऽ जा रहल एकटा यात्री रेलगाड़ी पर गोलीबारी शुरू कऽ देलक। जाफर एक्सप्रेसक नौ डिब्बामे लगभग ४०० यात्री छल। ट्रेन दक्षिण-पश्चिमी बलूचिस्तान प्रान्तक क्वेटासँ खैबर पख्तूनख्वाक पेशावर जा रहल छल, जखनि गोलीबारी भेल।
रिपोर्टक अनुसार, पुलिस आ रेलवे अधिकारीलोकनि कहलनि जे एहि हमलामे एकटा ट्रेन चालक घायल भऽ गेल। एकटा बयानमे उग्रवादी अलगाववादी समूह बलूच लिबरेशन आर्मी (बीएलए) एहि हमलाक जिम्मेदारी लेलक आ कहलक जे ओ सुरक्षा बल सहित लोकसभकेँ ट्रेनसँ बंधक बना लेलक।
बीएलए दावा कयलक जे ओ १०० सँ बेसी लोककेँ बंधक बना लेलक आ ओकर अभियानमे छओ सुरक्षाकर्मी मारल गेल। ओ कहैत छथि जे बंधक बनाओल गेल लोकमे सुरक्षा अधिकारी सेहो शामिल अछि।
प्रांतीय सरकार वा रेलवेक अधिकारी बंधककेँ पकड़बाक पुष्टि नहि कयलक। रेलवेक एकटा अधिकारी बतौलनि जे सुरक्षा बल बलूचिस्तानक बोलन जिलाक मुश्कफ क्षेत्रमे घटना स्थल पर पहुँचि गेल अछि। सरकारक प्रवक्ता शाहिद रिंद कहलनि जे बलूचिस्तान सरकार आपातकालीन उपाय लागू कयलक अछि आ स्थितिसँ निपटबाक लेल सभ संस्थानकेँ जुटान कयल गेल अछि।
जनतब अछि जे अशांत बलूचिस्तानमे अलगाववादी उग्रवादी समूह एहि क्षेत्रमे सेना आ चीनी परियोजनापर लगातार हमला कऽ रहल अछि। बीएलए बलूचिस्तानक स्वतंत्रता चाहैत अछि। ई कतेको जातीय विद्रोही समूहमे सबसँ पैघ अछि जे दशकसँ पाकिस्तानी सरकारक विरुद्ध लड़ैत आबि रहल अछि। संगठनक दावा अछि जे सरकार बलूचिस्तानक समृद्ध गैस आ खनिज संसाधनक अनुचित दोहन कऽ रहल अछि। बीएलएकेँ पाकिस्तान, ईरान, चीन, यूनाइटेड किंगडम, अमेरिका, संयुक्त राष्ट्र आ यूरोपीय संघ द्वारा आतंकवादी संगठनक रूपमे नामित कयल गेल अछि।
