स्मरणीय व निर्णायक संकल्पसँ ओतप्रोत द्वि-दिवसीय नाशिक अधिवेशन सोल्लासपूर्वक भेल सम्पन्न : अध्यक्ष
स्मरणीय व निर्णायक संकल्पसँ ओतप्रोत द्वि-दिवसीय नाशिक अधिवेशन सोल्लासपूर्वक भेल सम्पन्न : अध्यक्ष
‘महाराष्ट्रक सांस्कृतिक शहर एवम् कुम्भनगरी नाशिकमे मैथिल समन्वय समिति द्वारा द्वि-दिवसीय “नाशिक अधिवेशन – 2025 केर स्मरणीय आयोजन संदीप विश्वविद्यालय सभागार, नाशिकमे नव संकल्पक संग सोल्लासपूर्वक सम्पन्न भेल।’ ई उद्गार मैथिल समन्वय समितिक अध्यक्ष राजकुमार झा मैपुप्र समदियाक समक्ष व्यक्त कयलनि।
अध्यक्ष राजकुमार झा आगू कहलनि, अधिवेशन दू-सत्रमे वर्गीकृत कयल गेल छल। दिनांक 13 सितम्बर, 2025 यथा शनिदिन सायंकाल प्रथम सत्रक शुभारंभ गोसाउनिक गीत एवम् दीप प्रज्वलन केर उपरान्त विधिवत शुभारंभ भेल। प्रथम सत्रक विषय बिजनेस काॅन्क्लेव छल जेकर अध्यक्षता गिरीश चन्द्र मिश्र कयलनि।”
प्राप्त जानकारीक अनुसार समितिक संरक्षक डाॅ. संदीप झाक मार्गनिर्देशनमे समितिक अध्यक्ष राजकुमार झा बिजनेस काॅन्क्लेव केर प्रस्तावना प्रस्तुत कयलनि। जाहिमे प्रस्तावित 25 क्षेत्रवार सूचीक जानकारी राखल गेल।
अधिवेशनकेँ संबोधित करैत संरक्षक संदीप झा कहलनि जे मैथिल उद्यमी एवम् मुंबईक अन्य स्थानीय उद्यमीक संग आपसी तालमेल करैत प्रस्तावित बिजनेस काॅन्क्लेवमे सहभागिता सुनिश्चित करबाक अछि। अपन संबोधनमे 500 उद्यमीक भागीदारी 25 सँ बेशी क्षेत्रमे परस्पर सहयोगक संग वर्गीकृत करबाक आह्वान कयलनि। जाहिसँ ब्रांडिग प्रक्रियाकें सशक्त आओर प्रभावी बनाओल जा सकय।
जनतब जे प्रथम सत्रमे 30 वक्तागण संबंधित विषय पर अपन-अपन विचार व्यक्त कयलनि। एवम् प्रकारेण प्रथम सत्रक समापन राष्ट्रगानक उपरांत कयल गेल। सत्रक संचालन धनंजय झा द्वारा कयल गेल।
अधिवेशनक दोसर सत्रक शुभारंभ दिनांक 14 सितम्बर, 2025 कें समितिक संस्थापक अध्यक्ष प्रेमचन्द्र झा (प्रेमजी) केर अध्यक्षतामे प्रारम्भ भेल। समितिक अध्यक्ष राजकुमार झा द्वारा द्वितीय सत्रक प्रस्तावित विषय “मैथिल समन्वय समितिक विकास एवम् विस्तार” प्रस्तुत कयल गेल। संरक्षक संदीप झाक उपस्थितिमे 18 वक्तागण समितिसँ जुड़ल महत्वपूर्ण विषय पर विचार प्रस्तुत कयलनि। एवम् प्रकारेण 17 वक्तागण अपन-अपन विचार व्यक्त कयलनि। संरक्षक डाॅ. संदीप झा वक्तागण द्वारा व्यक्त सुझाव पर बिन्दूवार सुधार करबाक आश्वासन देलनि। संगहिं समिति कार्यालयक नियमित संचालन हेतु फुलटाइम स्टाफ नियुक्तिक लेल नाम प्रस्तावित करबाक सुझाव मँगलनि।
दोसर सत्रक अध्यक्ष प्रेमचन्द्र झा उपस्थित समस्त पदाधिकारी समेत अन्य सम्मानित महानुभावक प्रति आभार व्यक्त करैत समितिक यशस्विताक कामना कयलनि।
समितिक सचिव पंकज झा दोसर सत्रक संचालन कयलनि। सचिव पंकज झा कहलनि, “द्वि-दिवसीय अधिवेशन समितिक वर्तमान तथा भव्य भविष्यक लेल संजीवनी बूटी सदृश काज करबाक प्रति उत्साहित करैत रहत।”
आगू अध्यक्ष राजकुमार झा जनतब देलनि जे “समितिक पदाधिकारीगण लाल कुर्ता उज्जर धोती-पायजामा परिधानमे सुसज्जित भऽ विश्वविद्यालयक भव्य सभागारक शोभा वर्द्धित कऽ रहल छलाह। दुनू दिनक वातावरणमे समितिक यशोलतिका गुंजायमान भऽ रहल छल। मुंबई एवम् नाशिकसँ पहुँचल महानुभावक बाह्य भंगिमा एवम् दू दिनक प्रवासक स्मृतिकें बहुत दिन धरि विस्मृत नहि होमय देत। समिति आबयवला समयमे समाजक एहने सहयोगक आकांक्षी बनल रहत। एहि विश्वास संग द्वि-दिवसीय नाशिक अधिवेशन – 2025 केर समापन भेल।”
