गोपाल खेमका हत्याकांडमे पटना पुलिसकेँ एकटा आओर पैघ सफलता भेटल अछि। पुलिस एहि हत्याक मास्टरमाइंड मानल जाइत व्यापारी अशोक साव’केँ गिरफ्तार कय लेलक अछि। एहि गिरफ्तारीकेँ एही पूरा मामिलाकेँ समाधानमे एगो महत्वपूर्ण कड़ी मानल जा रहल अछि।
पुलिस सूत्रक अनुसार अशोक साव पर शुरूएसँ शंका छल। पुलिस ठोस सबूत आ स्थानक आधार पर गिरफ्तार कयलक। जांचमे पता चलल जे अशोक साव एहि हत्याक साजिश रचने छल। एकरा अंजाम देबा लेल कॉन्ट्रैक्ट किलर उमेश यादव’केँ दस लाख टकाक ठेका देल गेल।
पुलिस सूत्रक कहब अछि जे अशोक साव उमेश यादवकेँ एक लाख रुपैयाक अग्रिम भुगतान कयने छल। पुलिस 7 जुलाईकेँ उमेश यादवकेँ गिरफ्तार कयलक। पुलिस ओकरा लगसँ बाइक, पिस्तौल, 80 कारतूस, दू टा मोबाइल फोन आ हत्यामे प्रयुक्त एक लाख रुपैया नगद बरामद कयलक।
पुलिस सूत्रक अनुसार विकास उर्फ राजा गोपाल, खेमकाक हत्याक मामिलामे उमेश यादवकेँ हथियार उपलब्ध करौने छल। 8 जुलाईकेँ पटनाक माल सलामी इलाकामे भेल मुठभेड़मे राजा पुलिस द्वारा मारल गेल।
गोपाल खेमकाक हत्याक बाद उमेश यादव अशोक सावकेँ फ्लैट पर रुकल छल। पुलिसकेँ आशंका अछि जे एहि हत्याक पाछु कारोबारी प्रतिद्वंद्विता छल आ अशोक साव खेमकाकेँ समाप्त करबाक योजना बनौलक। अशोक साव केर गिरफ्तारीसँ पहिने पुलिस एहि हत्याक मामिलामे पांच गोटेकेँ गिरफ्तार कय चुकल अछि।
फिलहाल पुलिस टीम एहि मामिलासँ जुड़ल अन्य पहलूक जांच कय रहल अछि। राज्यभरिमे बढ़ैत हिंसा आ जन आक्रोशक बाद बिहारक डीजीपी विनय कुमार काल्हि एही सम्बन्धमे प्रेस ब्रिफिंग देलनि। ओ कहलनि, तकनीकी साक्ष्यक आधार पर कार्यवाही कयल जा रहल अछि। , “एसटीएफ आ पटना पुलिस एसआईटीक गठन कयलक। अपराध स्थल पर भेटल सुराग आ सीसीटीवी निगरानी, मोटरसाइकिल आ शूटरक उपस्थितिक जानकारीक आधार पर शहरक सब सीसीटीवी कैमराकेँ स्कैन कयल गेल। जा धरि मोटरसाइकिलक पता नहिं चलल, एसआईटीके टीम लागल रहल। मोटरसाइकिलक पहिचान कयलाक बाद ओकर मालिकक पहिचान कय गिरफ्तार कय लेल गेल”।
जनतब जे बिहारक पैघ व्यापारी गोपाल खेमका’केँ 4 जुलाईकेँ भोरमे हुनकर आवासक बाहर गोली मारल गेल छल। एहि घटनाक बादसँ विपक्ष कानून व्यवस्थाक स्थितिके लऽ कऽ राज्य सरकार पर हमला कय रहल अछि। बता दी जे सात साल पहिने 2018 मे अपराधी द्वारा गोपाल खेमकाक बेटाकेँ गोली मारि कय हत्या कय देल गेल छल।
