स्टार निशानेबाज मनु भाकर रविदिन १२ सालक सूखाकेँ समाप्त कयलनि आ देशकेँ ओलम्पिक खेलमे निशानेबाजीमे पहिल पदक देलनि। एकर सङ्गहि मनु पेरिस ओलम्पिकमे देशक लेल पदक खाता सेहो खोललनि। राष्ट्रपति द्रौपदी मुर्मू, प्रधानमंत्री नरेन्द्र मोदी, नेता प्रतिपक्ष राहुल गांधी आ गृह मंत्री अमित शाह सहित कतेको दिग्गज नेता मनुकेँ हुनक ऐतिहासिक प्रदर्शनक लेल बधाई देलनि अछि। प्रधानमंत्री मोदी हुनकर प्रदर्शनकेँ एकटा अविश्वसनीय उपलब्धि बतौलनि।
पेरिसमे खेलल गेल महिला १० मीटर एयर पिस्टल फाइनल मैचमे मनु भाकर तेसर स्थान पर रहलीह आ एहिसँ ओ कांस्य पदक जितलीह। मनु पेरिस ओलम्पिकमे देशक लेल पदक खाता सेहो खोललनि। ओ ओलम्पिकमे पदक जीतनिहार देशक पहिल महिला निशानेबाज सेहो बनलीह। मनु ८ निशानेबाजक अन्तिम मैचमे २२१.७ अङ्कक सङ्ग कांस्य पदक जितलनि।
प्रधानमंत्री नरेन्द्र मोदी निशानेबाज मनु भाकरकेँ बधाई दैत कहलनि, “एकटा ऐतिहासिक पदक अछि। बहुत बढ़िया, भारतक लेल अपन पहिल पदक जीतबाक लेल मनु भाकरकेँ बधाई। कांस्य पदक पर बधाई। हुनकर उपलब्धि आओर विशेष अछि किएक तँ ओ भारतक लेल निशानेबाजीमे पदक जीतनिहार पहिल महिला बनि गेल छथि। एकटा अविश्वसनीय उपलब्धि।”
राष्ट्रपति द्रौपदी मुर्मू सेहो सोशल मीडिया एक्स पर बधाई दैत ट्वीट कयलनि, “पेरिस ओलम्पिकमे १० मीटर एयर पिस्टल निशानेबाजीमे कांस्य पदक जीतिकय देशक नाम रोशन करयवला निशानेबाज मनु भाकरकेँ हार्दिक बधाई। ओ निशानेबाजी प्रतियोगितामे ओलम्पिक पदक जीतनिहार पहिल भारतीय महिला छथि। देश के मनु भाकर पर बहुत गर्व अछि। हुनकर उपलब्धि बहुत रास खेलाड़ीसभ, विशेष रूपसँ महिलासभकेँ प्रेरित करत।”
कांग्रेस नेता आ लोकसभामे विपक्षक नेता राहुल गांधी सेहो मनु भाकरकेँ बधाई दैत कहलनि, “पेरिस ओलम्पिक खेलमे भारतकेँ अपन पहिल पदक जीतैत देखि गर्व अछि। कांस्य पदक जीतबाक लेल मनु भाकरकेँ बधाई। ओलम्पिक पदक जीतनिहार पहिल भारतीय महिला निशानेबाज। हमर बेटी सभ हमरा सबकेँ बढ़िया शुरुआत देलखिन। आगुओ बहुत किछु होएत।अहाँक उपलब्धि पर गर्व”
केन्द्रीय गृह मंत्री अमित शाह सेहो मनु भाकरकेँ हुनक सफलताक लेल बधाई देलनि आ कहलनि, “पेरिस ओलम्पिकमे कांस्य पदक जीतय लेल मनु भाकरकेँ बधाई। अहाँ अपन शानदार प्रदर्शनसँ पूरा देशमे उत्साहक लहरि पसारि देने छी। अहाँक उपलब्धि पर पूरा राष्ट्र गर्वसँ भरल अछि।”
हरियाणाक मुख्यमंत्री नायब सिंह सैनी सेहो निशानेबाज मनु भाकरकेँ कांस्य पदक जीतबाक लेल बधाई देलनि। पेरिसमे पदक जीतनिहार मनुक काका बलजीत सिंह कहलनि, “ई पूरा देशक लेल गर्वक बात अछि जे महिला निशानेबाजीमे पहिल बेर पदक आयल अछि। हम स्वर्ण पदकक उम्मीद कए रहल छलहुँ मुदा ई सेहो एकटा नीक उपलब्धि अछि। ओ बहुत मेहनत कयने अछि।
भारतकेँ १२ सालक बाद ओलम्पिक खेलमे निशानेबाजीमे पहिल पदक भेटल। २०१२क लंदन ओलम्पिकक बाद निशानेबाजीमे भारतक ई पहिल ओलंपिक पदक छल। भारतीय निशानेबाज २०१६ रियो ओलम्पिक आ २०२० टोक्यो ओलम्पिकमे पदक जीतबामे असफल रहल।
