मुंबई साहित्यिक बैसारक तत्वावधानमे मीरा रोड स्थित बालाजी गार्डनमे, जानकी नवमीक पूर्व संध्या पर जानकी जन्मोत्सव एवं उन्नैसम काव्यगोष्ठीक आयोजन कएल गेल। एहि कार्क्रममे मुंबई आ आसपास क्षेत्रक कवि एवं रचनाकार अप्पन प्रस्तुति देलनि। ओना त’ मायानगरी मुंबईमे, विपुल संख्यामे मैथिल निवास करैत छथि मुदा, मुंबईक प्रवासी मैथिल समाज, साहित्यिक गतिविधिसँ स्वयंकेँ फराके रखैत रहल अछि। आब स्थितिमे बहुत हद धरि सुधार देखल जा रहल अछि।
मुंबई साहित्यिक बैसारक माध्यमे विनोद कुमार झा (सरकार) द्वारा शुरू कएल गेल ई साहित्यक गतिविधि जगजियार भेल अछि। किछुए समय पूर्व मुंबईमे मैथिली लिटरेचर फेस्टिवल सेहो संपन्न भेल छल, जाहिमे देश-विदेशसँ रचनाकार सभ सहभागी भेल छलाह। मुंबई केर आजाद मैदानसँ शुरू भेल ई यात्रा, अप्पन उन्नैस पड़ाव पार क’ चुकल अछि। एहि क्रममे मुंबई आ उपनगर क्षेत्रसँ अनेको नव-पुरान कवि आ रचनाकार लोकनिक सक्रियता, नव आ प्रतिभाशाली रचनाकार मार्गदर्शन लेल वरदान सिद्ध भ’ रहल अछि। आब मुंबई सन महानगरमे सैकड़ोके संख्यामे कवि आ साहित्यकार साहित्यिक गतिविधिसँ जुड़ल छथि, ई, एहि बैसारक लेल कोनो उपलब्धिसँ कम नहि अछि।
जनतब जे हर मास एहि समूह द्वारा मीरा-भायंदर स्थित मिथिलाक दलान पर एहि तरहक साहित्यिक बैसारक आयोजन कएल जाइत अछि। कवि फूल झा केर सहयोगसँ उपलब्ध कराओल गेल ई, मिथिलाक दलान, कवि आ रचनाकार लोकनिक लेल कोनो सनेशसँ कम नहि अछि, फलतः बहुत रास नव-नव रचनाकार सोझा आबि रहल छथि जे, मुंबई साहित्यिक बैसारक गतिविधिकें बल प्रदान करैत अछि। ओना त’ बहुत रास रचनाकार अप्पन प्रस्तुतिसँ दर्शक आ श्रोता लोकनिकें बान्हि क’ रखबामे सफल भेलाह, मुदा मंच पर विनोद कुमार झा, विभारानी, डॉ प्रतिभा झा (उन्मेषा), रेखा सिंह, मनोरमा झा, एवं मंच संचालक – पंकज झा संगहि बैसारक प्रमुख मार्गदर्शक (समीक्षक) प्रो कृष्ण कुमार झा केर उपस्थिति, नव रचनाकार लेल उत्साहबर्धक सिद्ध भेल।
एहि सफल आयोजन लेल मीरा-भायंदर मैथिल समाज आ मुंबई साहित्यिक बैसारक तमाम सदस्य, विगत किछु दिनसँ अत्यधिक प्रयासरत छलथि। कार्यक्रममें काव्य पाठ कएनिहार कविमे, राजकुमार झा, संतोष खां, अरुण चौधरी, रामनरेश शर्मा, ज्योति शर्मा, परमानन्द शर्मा, भास्कर झा, पंकज पाठक, संतोष झा, प्रमोद प्रवासी, धनुर्धर झा, रूबी झा, पीताम्बर झा, गौरीकान्त झा, धर्मेंद्र कुमार झा, अरविन्द झा, प्रभु मिश्र, फूल झा, ख़ुशी झा, कुणाल ठाकुर, राजीव सिंह, आदि छलथि।
एहि कार्यक्रममे तमाम मैथिल अभियानी लोकनिक सहभागिता देखल गेल, जाहिमे प्रमुख रूपसँ अजित झा, वरुण झा, राजीव प्रियदर्शी, रोहन झा, राकेश झा, राम उदार झा, सुनील झा, इत्यादि उपस्थित छलथि।
