मैथिल समाज सेवा संस्था मीरारोड (मुंबई) केर तत्वावधानमे, मीरारोड स्थित सुरभि सभागारमे, विगत रविदिन दिनांक 13.07.2025, सायंकाल 5 बजेसँ विद्यार्थी सत्कार एवं मार्गदर्शन शिविर- 2025 केर सफल आयोजन संपन्न भेल। जनतब दी जे, संस्था द्वारा हर वर्ष एहि तरहक कार्यक्रमक द्वारा मेधावी छात्र-छात्रा सभकेँ सम्मानित एवं प्रोत्साहित कएल जाइत रहल अछि। एहि कार्यक्रमक सफलताक लेल संस्थाक तमाम सेवाधारी, लगभग एक माससँ प्रयासरत छलथि। एहि मार्गदर्शन शिविरमे, संस्था द्वारा एहि वर्ष दसवीं आ बारहवीं परीक्षा निक अंकसँ उत्तीर्ण छात्र – छात्रा सभकेँ सम्मानित कएल गेल, संगहि संस्थाक पदाधिकारी द्वारा निर्धन मेधावी छात्र – छात्राकेँ उच्च शिक्षाक लेल उचित सहयोग देबाक घोषणा सेहो कएल गेल।
कार्यक्रममे छात्र-छात्रा सभकेँ संबोधित करैत संस्थाक अध्यक्ष सीए नीलेश चौधरी कहलनि कि, छात्र – छात्रा सभकेँ हर तरहक सहयोग लेल संस्था संकल्पित अछि आ आगूओ एहि तरहक कार्यक्रमक द्वारा जरूरतमंद छात्र सभकेँ सहयोग कएल जाइत रहत।
एहि कार्यक्रममे छात्र सभक मार्गदर्शन लेल, हर क्षेत्रक मार्गदर्शक उपस्थित छलथि, जे अप्पन अनुभव आ सफलता प्राप्त करबाक सूत्र, उपस्थित छात्र -छात्रा सभक संग साझा कएलनि । छात्र – छात्रा सभ सेहो खूब उत्साहित छलथि, किएक त’ उच्च शिक्षाक लेल कोन विषयक चयन कएल जाए, आगू कोना बढ़ल जाए, एहि तरहक तमाम कठिन प्रश्न सभक उत्तर, एक्कहि मंच पर उपलब्ध छल।
एहि आयोजनमे मुंबई आ आसपासक क्षेत्रमे रहनिहार तमाम मैथिल बुद्धिजीवीक सहभागिता सेहो देखल गेल। कार्यक्रममे छात्र सभक मनोरंजन लेल मुकुंद जी अप्पन टीमक संग उपस्थित छलथि आ तहिना मंच सञ्चालनक क्रममे, समाजसेविका मनोरमा झा सेहो, छात्र सभक उज्जवल भविष्य एवं आगुक रणनीति पर सविस्तार अप्पन विचार प्रकट करैत रहलीह।
एहि कार्यक्रममे छात्र सभक मार्गदर्शन लेल प्रो कृष्णकुमार झा संगहि हर क्षेत्रक प्रतिष्ठित नाम अप्पन विचार रखैत छात्र-छात्रा सभक उज्जवल भविष्यक कामना कएलनि।
आयोजन समितिक तरफसँ संस्थाक अध्यक्ष नीलेश चौधरी, सचिव – दीपक झा, कोषाध्यक्ष राजू मिश्र, एवं संस्थाक तमाम पूर्व पदाधिकारीगण मौजूद छलथि जाहिमे ललित झा, राजीव प्रियदर्शी, संजय राय, राजेश झा, फूलकुमार झा, वरुण झा, विनोद शाह, शंकर झा, एवं आनो आन सदस्य तत्पर छलथि।
एहि कार्यक्रममे, छात्र सभकेँ सम्मानित तथा प्रोत्साहित करबाक लेल स्थानीय विधायक नरेंद्र मेहता, पूर्व विधायक गीता जैन, नगरसेविका नीला सोंस विशेष रूपसँ आयल छलथि। आर मैथिल अभियानीमे, पत्रकार के के झा, दीपक मिश्र, पंकज पाठक, धर्मेंद्र झा, महेश मिश्र, संगहि बहुत रास लोक उपस्थित छलथि।
