मैथिल जतय रहथि, अप्पन परंपरा आ मान्यताक पालन अवश्य करैत देखल जाइत छथि। ओना त’ ज्ञान आ विद्याक देवी माँ सरस्वती सदैव पूजनीय छथि मुदा, वसंत पंचमीक अवसर माँ शारदेक पूजन विशेष मानल जाइत छैक। त’ मुंबई सनक महानगरमे, विभिन्न मैथिल सेवी संगठन द्वारा भव्य सार्वजनिक सरस्वती पूजाक आयोजन हर क्षेत्रमे कएल जाइत अछि। चेम्बूर (मुंबई) मे सेहो कएक ठाम सार्वजनिक सरस्वती पूजाक पंडाल बनाओल जाइत अछि।
विहार मित्र मंडल (मैथिल सेवी संस्था) चेम्बूर द्वारा हर वर्षक भांति एहि वर्ष सेहो, विश्वविनायक मंदिर प्रांगण (कलेक्टर कॉलोनी) मे भव्य सरस्वती पूजाक आयोजन कएल गेल। संस्थाक अध्यक्ष धीरज मिश्र, जानकारी दैत कहलनि कि, दिनांक 3/2/2025 (सोमदिन) भगवतीक स्थापनाक संग पूजन प्रारम्भ भेल संगहि अखंड हरिनाम अष्टयाम संकीर्तन सेहो शुरू भेल, जाहिमे अनेको कीर्तन मंडली द्वारा नाम संकीर्तन कएल गेल। मुख्य पुजारी कृष्णा कुमार झा केर देखरेखमे तमाम विधि विधान नियम निष्ठापूर्वक संपन्न कराओल गेल। अत्यंत भक्तिपूर्ण वातावरणमे पूजन प्रक्रिया संपन्न भेल।
दोसर दिन दिनांक 4/2/2025 (मंगलदिन) पूजा आरती एवं हवनक संग विसर्जन भेल संगहि श्रद्धालु लोकनि लेल विशाल महाभंडाराक आयोजन सेहो संपन्न भेल। एहि सफल आयोजन लेल संस्थाक तमाम सेवाधारी जाहिमे, गणेश झा, रमेश कुमार झा, ललित मिश्र, विद्यानंद झा, रामसुंदर महतो, परमानंद झा, सुरेंद्र झा, पप्पू मिश्र, संतोष चौधरी, धर्मेंद्र झा, राघव झा, जीतेन्द्र झा, उमेश झा, आशीष झा, मनीष झा, नीलेश मिश्र गौतम झा, पंकज मिश्र संगहि तमाम कार्यकर्ता तत्पर छलथि।
