पीएम मोदीक पटना आगमनसँ पहिने महागठबंधनक प्रेस कॉन्फ्रेंस, असगर श्रेय लेबय पर मनोज झा’क कटाक्ष

पीएम मोदीक पटना आगमनसँ पहिने महागठबंधनक प्रेस कॉन्फ्रेंस, असगर श्रेय लेबय पर मनोज झा’क कटाक्ष

*

सांसद मनोज झा प्रेस कॉन्फ्रेंसमे पीएम मोदीक रोल पर सवाल उठौलनि। ऑपरेशन सिंदूरक सफलताक बाद पीएम मोदी बृहस्पतिकेँ बिहारक दू दिवसीय दौरा पर पटना पहुँचलाह। पीएम मोदी ऑपरेशन सिंदूरक सफलताक श्रेय लैत जनता संग उपस्थित होयवाला छलथि, तऽ महागठबंधन एकजुट भऽ पीएमक आगमन पर पैघ सवाल उठौलक अछि। सांसद मनोज झा रहस्यात्मक शैलीमे कहला कि ऑपरेशन सिंदूरमे ‘हम’ रहल अछि।

पीएम आगमनक 5 घंटा पहिने राष्ट्रीय जनता दलक कार्यालयमे महागठबंधन नेता सभक सामुहिक संवाददाता सम्मेलनक आयोजन कएल गेल, जाहिमे आरजेडी केर राज्यसभा सांसद मनोज झा, कांग्रेस प्रवक्ता राजेश राठौर, मुख्य प्रवक्ता शक्ति यादवक संग महागठबंधनमे शामिल वाम दलक कतेको नेता मौजूद रहलाह। एहि दौरान मनोज झा पीएम मोदी केर आगमन पर प्रश्न उठबैत कहला जे पहलगाम हमला बहुत पीड़ादायक घटना छल।

हम सभ देशवासीकेँ झंझकोरि देबयवाला ओ घटना छल। मुदा एहि घटनाक बाद जे ऑपरेशन सिंदूर केर तहत सफलता भेटल, ओहिमे ई साफ भऽ गेल जे “मैं” सँ ई सफलता नहिं भेटल बल्कि “हम” सँ सफलता भेटल। हम सब पार्टी सभक अथक प्रयास रहल आ हमर सेनाक द्वारा सफलताक अंजाम देल गेल। मुदा आब प्रधानमंत्री जी “मैं” देखाबय चाहैत छथि त’ देश आ बिहारक जनता सब किछु जानैत अछि।

ओ कहलनि जे चुनावी साल अछि तऽ प्रधानमंत्रीक आयब-जाएब होइत रहत। प्रधानमंत्रीसँ बिहारक सरकार विशेष राज्यक दर्जा किएक नै माँगि रहल अछि। जँ प्रधानमंत्री बिहारक संग ईमानदारीसँ ठाढ़ छथि तऽ जरूर आरक्षण पर बात करताह। बिहारमे आरक्षणक दायराक वृद्धि प्रधानमंत्रीक हाथमे अछि, एकरा नवम अनुसूचीमे शामिल किएक नहि कऽ रहल छथि। बिहारक कोनो राज्य संग ईर्ष्या नहि अछि, मुदा पीड़ा अवश्य अछि।

बिहार आर्थिक रुपसँ गुजरात जँका बनय चाहैत अछि, प्रधानमंत्रीक जतेक गुजरात पर ध्यान अछि, ओतेक बिहार पर किएक नहि। प्रधानमंत्री बिहारकेँ गुजरात जेकाँ किएक नहि बना रहल छथि ?

ओ कहला कि बिहारकेँ के चलाबैत अछि। बिहार नहिं तऽ ऑटो पायलट मोडमे अछि आ नहिं पायलट मोडमे।

ओतहि कांग्रेस प्रवक्ता राजेश राठौर कहलनि कि नीतीश कुमार विशेष राज्यक मांगकेँ छोड़ि देने छथि तऽ बिहार विकास कोना करत ? उद्योगक विषयमे कहने छलथि जे चंपारणक चीनी मिलसँ चाय पियब, मुदा किछु भेल नहि। बिहारमे अपराध चरम पर पहुँचि गेल अछि, लगातार गोली केर बौछार भऽ रहल अछि। पटनाक मुख्य-मुख्य सड़क आ बाजारमे लगातार गोली चलि रहल अछि। ओ कहलनि जे प्रधानमंत्री नरेंद्र मोदी आइ अबिते छथि। सुरक्षाक जिम्मेदारी नीतीश कुमार पर अछि, एकर वावजूद पटनामे लगातार गोली चलि रहल अछि।