राष्ट्रीय जनता दल (राजद) नेता तेजस्वी यादव बिहार विधानसभा चुनावसँ पहिने जदयू आ राष्ट्रीय जनता दल (राजद)क बीच गठबंधनक अटकलकेँ शनिदिन खारिज कऽ देलनि। राजद सांसद मनोज कुमार झा तेजस्वी यादवक बयान पर प्रतिक्रिया देलनि। ओ कहलनि जे आब कियो एम्हर-उम्हर नहि होयत, किएक तँ तेजस्वी यादव चुनावक लेल एकटा लंबा रेखा खींचि देलनि अछि।
मीडियासँ बातचीतमे राजद सांसद झा कहलनि “हमर माइ-बहिन योजना’ होय वा ‘200 यूनिट मुफ्त बिजली’ वा बेरोजगार युवाक लेल राहत वा ‘सामाजिक सुरक्षा पेंशन’, ओ सब चीजक लेल एकटा लम्बा लाइन खींचने छथि आ हमरा नहि लगैत अछि जे नीतीश कुमारक विचारधारा एहिमे कतहु फिट होएत।”
मनोज कुमार झा बिहारमे सीट बंटवाराक संबंधमे कहलनि, “जाहि दिन बिहारमे राजद आ कांग्रेसकेँ बीच सीट बंटवारा पर समझौता होएत, ओहि दिन जानकारी पहिने मीडिया’केँ देल जायत।
ओ ‘माता सीता मन्दिर’क निर्माणक विषयमे अमित शाहक वक्तव्य पर टिप्पणी करैत कहलनि, “माता सीताक बिना भगवान रामक कल्पना अधूरा अछि, जाहि कारणेँ ओ (अमित शाह) जय श्री राम कहैत छथि आ हम जय सियाराम कहैत छी। हम अमित शाहसँ कहब जे हुनका जय सियाराम कहब सीखबाक चाही, ई बहुत लाभदायक होयत।
बिहारमे बेटीक सुरक्षाक संबंधमे ओ कहलनि, “बिहारमे एकटा लड़कीक बेरहमीसँ हत्या कऽ देल गेल। सरकार एकरा झाँपएकेँ कोशिश कए रहल अछि। ओहि लड़कीक लेल न्याय मांगबाक लेल आइ संसदमे मकर द्वारक सामने विरोध प्रदर्शन कयल जा रहल अछि।
