यूट्यूबर मनीष कश्यप काल्हि पीके केर ‘जन सूरज’ पार्टीमे शामिल भऽ गेलथि। विधानसभा चुनाव लड़यकेँ योजना बना रहल छथि सेहो सामने आबि गेल अछि।
कश्यप काल्हि स्वयं सोशल मीडिया पर इशारामे एहि बारेमे जनतब देलनि। एकर संग-संग प्रशांत किशोर आ जन सूराज पार्टीक अध्यक्ष उदय सिंहक संग एगो तस्वीर सेहो शेयर कयलनि।
बता दी जे मनीष कश्यप पिछला मास भारतीय जनता पार्टीसँ इस्तीफा दऽ देने छलाह। मनीष कश्यप अप्रैल 2024 मे भाजपामे शामिल भेल छलाह, जे 2024 केर लोकसभा चुनावसँ ठीक पहिने छल। ओना करीब एक सालक भीतर ओ भाजपासँ संबंध तोड़ि लेलथि।
यूट्यूबर मनीष कश्यप एक्स पर अपन अकाउंटसँ ट्वीट कय जन सूराजमे प्रवेश करबाक संकेत देने छलाह। मनीष कश्यप प्रशांत किशोर आ उदय सिंह केर संग एकटा तस्वीर शेयर कयलथि आ लिखने छलाह, “7 तारीख केँ बापू ऑडिटोरियम। हम सब बुझल उम्मीदकेँ फेरसँ जगबैत छी, हम सब घरमे इजोत आनब। हम सब पलायनक दर्दकेँ मेटा देब, हम सब फेरसँ नव बिहारक निर्माण करब।”
जनतबक अनुसार सोमदिन पटनाक बापू भवनमे डिजिटल योद्धा समागमक आयोजन कयल गेल। एहिमे ओ जन सूराज पार्टीमे शामिल भऽ गेलाह।
एखनि धरि प्राप्त जनतबक अनुसार मनीष कश्यप बिहारक चनपतिया विधानसभा सीटसँ चुनाव लड़य केर तैयारीमे छथि। हालहिमे एकटा चैनलकेँ देल गेल साक्षात्कारमे सेहो ओ एहि बातक खुलासा कयने छलाह। मनीष सेहो एहि क्षेत्रमे अपन सक्रियता बढ़ा लेने छथि । बता दी जे प्रशांत किशोर घोषणा कएने छथि जे बिहार विधानसभा चुनावमे जन सूरज पार्टी सभ 243 सीट पर चुनाव लड़त।
मनीष कश्यप एहिसँ पहिने सेहो चुनाव लड़ि चुकल छथि।
बताबी जे मनीष कश्यपक असली नाम त्रिपुरारी तिवारी अछि। हुनका यूट्यूबरक रूपमे जानल जाइत अछि। मनीष कश्यपक जन्म बिहारक पश्चिम चंपारण जिलामे भेल अछि। मनीष कश्यप 2020 केर विधानसभा चुनावमे चनपतिया विधानसभा सीटसं लड़लनि। कश्यपकेँ चुनावमे 9 हजारसँ बेसी वोट भेटल आ ओ तेसर स्थान पर रहलाह।
