एन. बीरेन सिंह काल्हि अपन इस्तीफा राज्यपाल अजय भल्लाकेँ सौंपि देलनि। सूत्रसँ जनतब अछि जे राज्यपाल हुनका नव सरकारक कार्यभार सम्हारबा धरि कार्यवाहक मुख्यमंत्रीक रूपमे काज करैत रहबाक लेल कहलनि अछि। संभावना अछि जे पार्टीक केन्द्रीय नेतृत्व एक-दू दिनक भीतर नव नेतृत्व पर निर्णय लेत। एम्हर गृह मंत्रालय सुरक्षा एजेंसी सभकेँ हाई अलर्ट पर रहबाक निर्देश देलक अछि।
एहि अवसर पर हुनका संग प्रदेश भाजपा अध्यक्ष ए. शारदा, भाजपाक मणिपुर प्रभारी संबित पात्रा आ १९ विधायक उपस्थित छलाह।
अपन त्यागपत्रमे ओ लिखलनि, “मणिपुरक लोकक सेवा करब सम्मानक बात रहल अछि। मणिपुरमे प्रत्येक व्यक्तिक कल्याणक लेल समय पर कार्यवाही, हस्तक्षेप, विकास कार्य आ विभिन्न परियोजनाक कार्यान्वयनक लेल हम केन्द्र सरकारक आभारी छी।”
ओ कहलनि, “ई पूरा साल काफी खराब रहल अछि। 3 मई, 2023सँ राज्यमे जे किछु भऽ रहल अछि, हम एकरा लेल राज्यक जनतासँ माफी मांगय चाहैत छी। कतेको गोटे अपन प्रियजनके खो देलनि। कतेको लोक अपन घर छोड़ि चुकल छथि। हमरा एहि पर अफसोस अछि। हम एकरा लेल माफी मांगैत छी। मुदा पछिला 3-4 माससँ राज्यमे शान्ति पसरल अछि। एहिसँ हमरा आशा अछि जे एहि वर्ष 2025मे राज्यमे स्थिति सामान्य भऽ जायत। जे अतीतमे भेल छल से ख़त्म भेल। आब हमरा अतीतक गलतीक बिसरि जेबाक चाही आ हमरा सभकेँ एकटा नव जीवन शुरू करबाक चाही।”
