मंगनी लाल मंडल बिहार राजदक अध्यक्ष पदक लेल शनिदिन (14 जून) नामांकन दाखिल कयलनि। नामांकन दाखिल करय लेल नेता प्रतिपक्ष तेजस्वी यादवक संग गाड़ीसँ पार्टी कार्यालय पहुंचलाह। नामांकनक समय राजद सुप्रीमो लालू यादव, राबड़ी देवी आओर मीसा भारती सेहो मौजूद छलथि।
मंगनी लाल मंडलक निर्विरोध चुनाव निश्चित अछि। कारण अध्यक्ष पद पर मात्र ओ नामांकन दाखिल कयने छथि। राजद कार्यालयमे पार्टीक प्रदेश चुनाव अधिकारी डॉ. तनवीर हसनक समक्ष नामांकन पत्र दाखिल भऽ गेल अछि। 19 जूनकेँ पटनाक ज्ञान भवनमे राजद राज्य परिषदक बैसारमे हुनक नामक औपचारिक घोषणा कयल जाएत। मात्र ओ अध्यक्ष पद लेल नामांकन दाखिल कयने छथि।
जगदानंद सिंहक जगह 76 वर्षीय मंगनी लाल मंडलकेँ बिहार राजद अध्यक्षक जिम्मेदारी भेटय जा रहल अछि। हुनका माध्यमसँ राजद चुनावी सालमे अत्यंत पिछड़ा वर्गकेँ लुभाबय केर कोशिशमे अछि। ओ अत्यंत पिछड़ल समाजक पैघ नेता छथि । बिहारमे एहि वर्गक आबादी सबसँ बेसी अछि जे 36 प्रतिशत अछि। मंगनी लाल मंडल बहुत दिनसँ राजदमे छलथि। तकर बाद ओ जदयूमे चलि गेलाह।
एहि साल जनवरीमे ओ जदयू छोड़ि फेर राजदमे आबि गेलाह। ओ 1986 सँ 2004 धरि बिहार विधान परिषदक सदस्य छलाह। एहि दौरान राज्य मंत्रिमंडलमे सेहो मंत्री छलाह। 2004 सँ 2009 धरि राज्यसभा सांसद सेहो रहलाह अछि, एहि साल अक्टूबर-नवंबरमे बिहारमे विधानसभा चुनाव होएत। आब समय बताओत जे चुनावमे एहि फैसलासँ राजदकेँ कतेक फायदा होएत।
