गिरिराज सिंह कहलनि जे प्रशासनक संरक्षणमे सभ कयल गेल। ओतय ममताक शासनमे हिंदू सुरक्षित नहि छथि। बंगालक लोक ई बात बुझि गेल छथि।
पश्चिम बंगालक मुख्यमंत्री ममता बनर्जी पर गिरिराज सिंह एक बेर फेर जोरदार प्रहार कयलनि। गिरिराज सिंह ई बात ममता बनर्जीक 27 दिनक बाद पीड़ितसँ भेटय मुर्शिदाबाद पहुँचबा पर निशाना साधैत कहलनि। ओ बंगालक सीएम पर तंज कए कहलनि जे जखनि बंगालमे हिंदूक भीतर एकटा आक्रोशक भावना जागि उठल, तखनि 27 दिनक बाद ओ हुनकर हाल-चाल जानय आयल छथि।
केंद्रीय मंत्री गिरिराज सिंह कहलनि, “ममता बनर्जी वोट आ तुष्टीकरणक राजनीति करैत छथि। ममता बनर्जी कहलनि जे हमरा रहैत कियो कोनो बांग्लादेशीकेँ बाहर नहि निकालि सकैत अछि। मुर्शिदाबादमे हिंदू सभक घरक बाहर निशान बना कऽ हुनक हत्या कएल गेल अछि। प्रशासनक संरक्षणमे सभ किछु कएल गेल, जखनि बंगालमे सभ हिंदूक भीतर एकटा आक्रोशक भावना जागल, तखनि 27 दिनक बाद ममता बनर्जी घड़ियाली आँसू बहेबाक लेल मुर्शिदाबाद पहुँचलथि। ओहि ठाम हुनकर शासनमे हिंदू सुरक्षित नहि छथि। बंगालक लोक एहि बातकेँ बुझि गेल छथि।”
एहीसँ पहिने ममता बनर्जी पर निशाना साधैत गिरिराज कहने छलाह जे ओ बंगालकेँ बांग्लादेश बनाबय चाहैत छथि। ओहिठामक हिंदू मतदाता ममता बनर्जीक व्यवहारसँ डेरायल अछि। एही बेर चुनाव आयोगक दिसिसँ जौं कोनो स्पेशल एक्शन नहि भेल तँ ओहिठामक हिंदू वोटरकेँ बहुत कठिनाई होयत।
जनतब जे पश्चिम बंगालक मुख्यमंत्री ममता बनर्जी रविदिन मुर्शिदाबादक हिंसा प्रभावित क्षेत्रक दौरा कएलनि। घटनाक 27 दिन बाद ओहिठाम जयबा पर केंद्रीय मंत्री गिरिराज सिंह ई पैघ हमला कएलनि अछि।
