मैथिली ठाकुरक प्रचारक भाजपाक केतकी सिंह द्वारा मिथिलाक सम्मानक प्रतीक पागक अपमान घोर निंदनीय : प्रो. शीतलांबर झा
!! प्रो शीतलांबर झा महासचिव मैथिल समाज रहिका, मधुबनी प्रेस विज्ञप्ति जारी कय कहलनि कि, “दरभंगा जिलाक अलीनगर विधानसभाक प्रत्यासी मैथिली ठाकुरक पक्षमे प्रचारक दौरान भाजपाक विधायक केतकी सिंह द्वारा आठ करोड़ मिथिलावासीक पहिचान , अभिमान, स्वाभिमान, सम्मान एवं संस्कृतिक केर प्रतीक पाग केर अपमानित करब घोर निन्दनीय एवं जघन्य अपराध अछि जकरा आठ करोड़ मिथिलावासी बर्दाश्त करय लेल तैयार नहिं अछि।”
प्रो झा कहलनि भाजपाक विधायक एवं नेता सभक लगातार मिथिलाक अस्मिता पर हमला करब आब हुनका विधानसभा चुनावमे बहुते महंगा पड़यबाला अछि। विधायक केतकी सिंहक ई कहब जे मिथिलाक पागसँ पैघ मैथिली ठाकुर अछि, ई दर्शाबैत अछि कि भाजपाक नेता सभकेँ कतेक मिथिला , मैथिली संस्कृतिक प्रति स्नेह रहि गेल अछि, ओ हमर सभक पूर्वजक धरोहरक सेहो अपमान कयलनि अछि।
प्रो झा कहलनि, ” मिथिला आदिकालमे देश छल, हमर सभ्यता आ संस्कृति विश्व प्रसिद्द अछि मिथिलाक राजा जनक, जगदम्बा माता सीता , ज्योतिश्वर ठाकुर , विद्यापति , राजा सलहेश , दीनाभद्री , वीर लोरिक , अयाची , वाचस्पति सहित कतेकोंक अपमान भेल अछि।”
शीतलांबर झा आगा कहलनि,”ओतहि गत दिवस बिस्फीक विधायक हरिभूषण ठाकुर बचौल सेहो मिथिलाराज्यक विरोध करैत कहने छलथि कि ‘मिथिलाराज्य माने मुस्लिमराज’ कहिकेँ अपमान कयने छलथि। हुनका मिथिलाक इतिहासक कोनो जानकारी नहिं अछि आ नहिं हुनका सनातन संस्कृतिक जानकारी अछि।
प्रभु श्रीराम जीक स्वयंवर मिथिलेमे भेल छल जगजननी माता सीताजीसँ। जकरा ओ मुस्लिमराज कहिकेँ मिथिलाक भगिना लव, कुश, हनुमान जी एवं भगवान श्री गणेश जी एवं कार्तिकेय अपमानित भेलथि।
प्रो झा अलीनगर एवं बिस्फी विधानसभाक लोक सभसँ अपील कयलनि अछि कि मिथिला विरोधी एहि दुनू उम्मीदवारक खिलाफ मतदान कय मिथिलाक अस्मिताक रक्षा करी।
यद्यपि प्राप्त समाचारक अनुसार केतकी सिंह जनतासँ पागक अपमानक लेल क्षमा याचना कयलनि अछि, तथापि लोकक आक्रोश कम नहिं भऽ रहल अछि, भरिसक लोक एहि पर मैथिली ठाकुरक सेहो प्रतिक्रिया चाहैत अछि, कारण लोकक कहब अछि जे मैथिली ठाकुरकेँ ओतहि एकरा सँभारि लेबाक छल, आ पाग उठा ई कहय चाहैत छल जे नहिं पाग मिथिलाक सम्मान अछि, मिथिलावासीक सम्मान अछि, हमरो सम्मान अछि, पागसँ बढ़िकें हम नहिं।
