कार्तिक धवल त्रयोदशी अर्थात् एहि बेर १३ नवम्बर २०२४ क’ मैथिली परिषद, मुजफ्फरपुर द्वारा मैथिल कोकिल विद्यापतिक पुण्य तिथि पर महाकविकेँ श्रद्धांजलि दैत विद्यापति पर्व समारोहक आयोजन भामती मंच, खादी भंडार सभागार, कन्हौली रोड, मुजफ्फरपुरमे कयल।
कार्यक्रमक शुभारंभ संध्या काल ४ बजे शंख नाद, स्वस्ति वाचनक संग मुख्य अतिथि पूर्व मंत्री, बिहार सरकार सुरेश शर्मा द्वारा दीप प्रज्वलित कय भेल। दीपा लक्ष्मी भगवती गीत जय जय भैरवी गाबि सांस्कृतिक कार्यक्रमक शुरुआत कयलनि। ओहिकेँ उपरांत प्रो० नूतन कुमारी द्वारा स्वागत गान मंगलमय दिन आजु हे भेल।
विशिष्ट अतिथिक रुपमे जिला सांस्कृतिक कार्यक्रम पदाधिकारी सुष्मिता झा उपस्थित छलीह। विद्यापति गीत कनक भूधर शिखर वासिनी गाबि दर्शक सबकेँ मंत्र मुग्ध कय देलनि। मुख्य अतिथि द्वारा मैथिली परिषदक स्मारिका ‘आँजुर’ केर विमोचन भेल।अहि स्मारिकाक संपादन डा० शशिकान्त पाठक कयलनि अछि। स्थानीय कलाकार डा० अनिल ठाकुर, सुरेन्द्र नाथ ठाकुर, उदय कुमार झा एवं अन्य सबहक गीतक प्रस्तुति उत्कृष्ट छल। कुमारी मिष्टी केर भाव नृत्य पर सभागारमे करतल ध्वनि गू्ँजि रहल छल। श्रीमती सलोनी झा द्वारा ‘ डमरुआ हे गौरा ल’ गेल चोर’ पर भाव नृत्य देखि दर्शक लोकनि मंत्र मुग्ध भेलथि। जय प्रकाश पाठक जी द्वारा शिव स्तुति एवं दुर्गा स्तुति पर भाव नृत्य केर प्रस्तुति भेल एवं दरभंगाक सृष्टि फाउंडेशन द्वारा मिथिला दर्शन केर प्रस्तुति अद्भुत रहल।
कार्यक्रमक मुख्य आकर्षण रहल दिल्लीसँ आयल शास्त्रीय कलाकार डा० राणा झा द्वारा विद्यापतिक पदावलीक प्रस्तुति।आजुक कार्यक्रममे मंच संचालन कयलनि उद्घोषिका निशा श्री। मैथिली परिषद, मुजफ्फरपुर केर अध्यक्ष बेबी चौधरी अध्यक्षीय भाषण देलनि।
