धरती पुत्री माँ जानकी केर प्राकट्य दिवस समारोह विद्यापति सेवा संस्थानक तत्वावधानमे अगिला 6 मईकें धूमधामसँ मनाओल जायत। संस्थानक प्रधान कार्यालय परिसरमे प्रातः काल माँ जानकी केर प्रतिमाक शास्त्रीय विधिसँ पूजा-अर्चना होयत। एकर बाद मैथिली दिवस समारोहक भव्य आयोजन कयल जायत। ई निर्णय मंगल दिन देर साँझ संस्थानक कार्यकारी अध्यक्ष डा बुचरू पासवान केर अध्यक्षतामे आयोजित बैसारमे सर्वसम्मति सँ लेल गेल।
मौका पर महासचिव डा बैद्यनाथ चौधरी बैजू कहलनि जे संस्थान अनेक दशकसँ जानकी नवमी केर लगातार भव्य आयोजन करैत आबि रहल अछि। जखनिकि बीतल करीब एक दशकसँ बेसी समयसँ मूर्ति पूजा सेहो कयल जा रहल अछि। जानकी नवमी केर विस्तार-अभियान निरंतर प्रगति क’ रहल अछि। आइ राष्ट्रीय स्तर पर हजारों स्थान पर जानकी नवमी समारोहपूर्वक मनाओल जयबाक क्रम आरम्भ भ’ चुकल अछि। ओतहि अमेरिका, जर्मनी, कैलिफोर्निया, रूस आदि देशमे सेहो प्रवासी मैथिल पूर्ण उत्साहसँ जानकी नवमी केर आयोजन क’ रहल छथि।
ओ बतेलनि जे संस्थानक जानकी नवमी समारोहमे संस्थानक संरक्षक द्वय क्रमशः ललित नारायण मिथिला विश्वविद्यालय केर कुलपति प्रो संजय कुमार चौधरी आ कामेश्वर सिंह दरभंगा संस्कृत विश्वविद्यालयक कुलपति प्रो लक्ष्मी निवास पांडेय संग अनेक गणमान्य व्यक्तिक गरिमामयी उपस्थिति रहत। डा बैजू जानकी अभियानमे जुटल सभ संस्था कें साधुवाद दैत मिथिला केर प्रत्येक घरमे जानकी पूजन सुनिश्चित करबाक आह्वान कयलनि। ताकि मिथिलामे नारी सशक्तिकरण केर अभियान आओर बेसी विस्तार ल’ सकय।
मौका पर मैथिली अकादमीक पूर्व अध्यक्ष पं कमलाकांत झा कहलनि जे विद्यापति सेवा संस्थानक घर-घर जानकी पूजन महाभियानकें मिथिलावासी आ प्रवासी मैथिलक भरपूर सहयोग आ समर्थन भेटि रहल अछि। एकर सुखद परिणामक रूपमे देश-विदेशमे शिवधनुर्धारिणी जानकी नवमी समारोहक मचल धूम सद्यः प्रमाण अछि।
एहि अवसर पर आयोजित होबय बला जानकी-सम्मेलनक संयोजिका एक बेर फेर ध्वनि मतसँ डा सुषमा झाकें बनाओल गेल। जखनि कि एहि सम्मेलन कें यादगार बनेबा लेल हुनक अध्यक्षतामे एकटा कोर कमिटी गठित कयल गेल। एहि कोर कमिटीमे डा ममता ठाकुर आ प्रो उषा चौधरीकें शामिल कयल गेल।
मीडिया संयोजक प्रवीण कुमार झा अपन संबोधनमे माँ जानकी केर प्राकट्य दिवस पर जानकी सम्मेलन केर आयोजनकें अत्यंत उपयोगी बतेलनि आ सभ माय-बहिनकें एहिमे शामिल होयबा लेल सघन जनसंपर्क अभियान चलाओल जयबा पर बल देलनि। नारी सशक्तिकरण केर क्षेत्रमे उत्कृष्ट योगदान लेल संस्थान द्वारा प्रतिवर्ष देल जाय बला जानकी सम्मान पर अगिला बैसारमे चर्चा करबाक निर्णय लेल गेल।
बैसारमे विनोद कुमार झा, डा महानन्द ठाकुर, प्रो अरुण सिंह, विजय शंकर झा, दुर्गा नन्द झा, प्रो चंद्रशेखर झा बूढाभाई, डा उदय कांत मिश्र, आशीष चौधरी, वैद्य गणपति झा, नवल किशोर झा, मिथिलेश ठाकुर, रामाज्ञा झा, शंभु नाथ मिश्र, डा उषा चौधरी, डा ममता ठाकुर, डा सुषमा झा, प्रकाश चन्द्र मिश्र, प्रो राजकिशोर झा आदि सेहो अपन मूल्यवान विचार रखलनि। अध्यक्षीय संबोधनमे डा बुचरू पासवान सभ गोटेसँ एकस्वरमे संस्थानक एहि आयोजनसँ समग्र समाजकें जोड़बाक प्रति संकल्प लेबाक आह्वान कयलनि।
