हर वर्षक भांति एहि वर्ष सेहो, विगत 7 मार्च 2025 (शुक्रदिन), मैथिल समाज सेवा संस्थाक तत्वावधानमे, मीरा भायंदर स्थित बालाजी गार्डनमे, अति सौहार्दपूर्ण वातावरणमे, भव्य फगुआ स्नेह मिलन समारोहक आयोजन कएल गेल। मैथिल समाज सेवा संस्थाक तमाम कार्यकर्त्ता एहि सफल आयोजनक लेल उत्साहित छलथि।
एहि कार्यक्रमक नियार त’ पहिनहिसँ छल फलतः स्थानीय एवं आसपासक क्षेत्रमे रहनिहार तमाम मैथिलकेँ आमंत्रित कएल गेल छल। अंतर्राष्ट्रीय महिला दिवसक पूर्व संध्या पर आयोजित एहि कार्यक्रममे नारी शक्तिकेँ पुष्प गुच्छ एवं शाल द’ सम्मानित सेहो कएल गेल। सम्मानित नारी शक्तिमे, गीता जैन (पूर्व विधायक), नीला सोंस (नगरसेविका), मनोरमा झा, श्वेता झा आदि प्रमुख छलथि।
समारोहक मुख्य आकर्षणक केंद्र छल, मंचक भव्यता आ मंच पर उपस्थित ओ तमाम कलाकार लोकनि जे, अप्पन सुमधुर गायन एवं भव्य नृत्यसँ उपस्थित दर्शकक मनोरंजन कएलनि। सांस्कृतिक एवं लोक संगीतक कार्यक्रम लेल प्रसिद्ध कलाकार अनिल जयसवाल म्यूजिकल ग्रुपक तमाम कलाकार उपस्थित छलथि।
स्थानीय मैथिल कलाकारमे, सुरेश आनंद, हिरा हमराही, पूजा उष्माकर एवं ज्ञानेश्रर दुबे सेहो अप्पन सुमधुर प्रस्तुतिसँ दर्शककेँ मंत्रमुग्ध कएलनि।
मैथिल समाज सेवा संस्थाक अध्यक्ष सीए नीलेश चौधरी, सचिव-दीपक कुमार झा, कोषध्यक्ष – राजू मिश्रक संग – संग तमाम पदाधिकारी जाहिमे प्रो कृष्ण कुमार झा, डॉ राकेश झा, संजय राय, ललित झा, अरुण चौधरी, राजेश झा, राजीव प्रियदर्शी, फूल झा, विनोद साह, वरुण झा, इंद्रमोहन झा, वीएन झा, मनोरमा झा, श्वेता झा, प्रतिभा झा, बिनीता झा, संगहि आनो आन कार्यकर्त्ता, आगंतुक लोकनिक स्वागत सत्कार लेल तत्पर छलथि।
लोक गीत एवं सांस्कृतिक कार्यक्रमक उपरांत मैथिल पारम्परिक व्यंजन सभ, भोजनक लेल सेहो उपलब्ध छल। एहि भव्य समारोहमे स्थानीय मैथिलक जुटान सेहो खुब देखल गेल।
