प्रतिक्षित मैथिली भाषीक सामाजिक-सांस्कृतिक संस्था ‘मैथिल समाज रहिका (मधुबनी) केर त्रिदिवसीय मिथिला विभूति समारोह आइसँ शुरू होबय जा रहल अछि। संस्थाक महासचिव प्रो. शीतलाम्बर झा मैपुप्र समदियाकेँ एकर रुपरेखाक विस्तृत जानकारी देलनि।
एहि परिप्रेक्ष्यमे आइ अर्थात २९-०३-२०२५, शनिकेँ सांझ ०४:३० बजे विद्यापतिक मूर्ति पर माल्यार्पण होएत। पुनः सांझ ०५:०० बजेसँ मुख्य समारोहक शुभारम्भ होएत, दिवंगत विभूति सभकेँ श्रद्धांजलि देल जाएत। तदुपरांत गीतनादक कार्यक्रम अछि।
आगू प्रो. झा दोसर दिन अर्थात ३०-०३-२०२५, रविक कार्यक्रमक जनतब देलनि। रविकेँ अपराह्न ०३:०० बजे ‘विचार गोष्ठी’ राखल गेल अछि, जकर विषय अछि – ‘प्रगति पथ पर मैथिली।’ संध्या ०७:०० बजे मुख्य समारोहक शुभारम्भ होएत। रात्रि ०८ बजेसँ क्रमशः कवि सम्मेलन, यात्री पुरस्कार, किरण पुरस्कार एवं सांस्कृतिक कार्यक्रमक आयोजन अछि।
तेसर दिन अर्थात ३१-०३-२०२५, सोमक कार्यक्रमक जानकारी दैत प्रो. शीतलाम्बर झा कहलनि जे एहि दिन संध्या ०७:०० बजे मुख्य समारोहक शुभारम्भ होएत। रवीन्द्र-महेन्द्र पुरस्कार एवं चुनचुन मिश्र पुरस्कार देल जाएत आ संध्या ०८:०० बजेसँ रंगारंग कार्यक्रमक आयोजन अछि।
