मैथिल समन्वय समिति अपन नवम वार्षिकोत्सव अत्यन्त उल्लासपूर्वक प्रबुद्ध एवम् विशिष्ट समाजसेवीक उपस्थितिमे आयोजित कयलक। नवी मुंबईक नेरूल स्थित डाॅ. राजेन्द्र प्रसाद भवन (बिहार मित्र मंडल) मिथिलामय बनल छल। मिथिलाक विभिन्न विभूतिक संक्षिप्त जानकारीसँ युक्त छायाचित्र मिथिलाक गौरवमय ऐश्वर्यक स्मरण कराबैत अतिथिक लेल आकर्षणक केंद्र बनल छल। विभिन्न सामाजिक संगठन एवम् वरिष्ठ समाजसेवीक उपस्थिति समारोहकें भव्यता प्रदान कयलक।
मैथिल समन्वय समिति विनम्रतापूर्वक समारोहमे उपस्थित महानुभाव एवम् अनेकों संगठनक सम्मानित प्रतिनिधिगणक प्रति विनम्र आभार व्यक्त कयलक।
नवम वार्षिकोत्सव, सेमिनार आयोजनक लेल स्मरण राखल जायत। मुख्य आर्कषण छल सेमिनार। जेकर विषय छल “मुंबई मैथिल समाज एवम् समन्वय।” वरिष्ठ समाजसेवी एस. सी. मिश्र सेमिनारक अध्यक्षता कयलनि। अनेकों विद्वान एवम् अनुभवी वक्ता सेमिनारक विषय पर स्पष्टतापूर्वक विचार व्यक्त कयलनि। एतबहिं नहि भविष्यमे एहेन आयोजनक आवश्यकताकें अनिवार्य बतौलनि।
वक्तागणमे छलाह भाष्कर झा, अवधेश मिश्र, कमलेश झा, प्रकाश झा, कृष्णकुमार झा ‘अन्वेषक’, विमल कुमार झा, मुनीन्द्र झा, धनंजय झा एवम् कृष्ण कुमार झा ‘किसुन’।
सेमिनारक समीक्षक समितिक वरिष्ठ पदाधिकारी एवम् पेट्रोन सदस्य धर्मेन्द्र कुमार झा छलाह। सभागारमे उपस्थित दर्शकवृन्द करतल थोपड़ी बजाय वक्तागणक प्रति अपन भावना व्यक्त कयलनि।
समिति द्वारा विगत् दू वर्षसँ समाजमे विशिष्ट सेवा कयनिहार वरिष्ठ समाजसेवीकें “प्रेरणा-सम्मान” सम्मानोपधि द्वारा सम्मानित करबाक परम्पराक निर्वहन करैत आबि रहल अछि। नवम वार्षिकोत्सवमे पाँच सम्मानमूर्ति यथा रमा झा, सतीश चन्द्र झा, महेश झा, बलवंत शास्त्री एवम् अशोक सिन्हाकें प्रेरणा-सम्मानसँ सम्मानित कयल गेल। सम्मानमूर्तिक सम्मान समितिक संरक्षक डाॅ. संदीप झा द्वारा कयल गेल।
अपन उद्बोधनमे संरक्षक डाॅ. संदीप झा उपस्थित दर्शकवृन्द एवम् वरिष्ठ समाजसेवीक प्रति आभार व्यक्त कयलनि। समिति द्वारा कयल जा रहल सामाजिक कार्यक उल्लेख करैत समस्त संगठनकेँ एकत्रित भऽ समाज सेवाक संकल्प लेबाक आह्वान कयलनि। संरक्षक द्वारा एहि वर्ष (२०२५) मुख्य दू कार्यक्रमक घोषणा कयल गेल। पहिल धीरज प्रतिभा सम्मान तथा दोसर बिजनेस काॅन्क्लेव। एहि घोषणा पर सभागारमे उपस्थित दर्शकवृन्द करतल थोपड़ीसँ स्वागत कयलनि। समितिक अध्यक्ष राजकुमार झा उपस्थित महानुभाव समेत विभिन्न मैथिलसेवी संगठनक प्रति आभार व्यक्त कयलनि।
समितिक पदाधिकारीगणक लाल कुर्ता, उज्जर पैजामासँ सुसज्जित उत्साहित ओ अतिथि-अभ्यागतक स्वागत करैत अत्यधिक प्रफुल्लित दृष्टिगोचर भेलथि। सभागारमे पदाधिकारीगण, उपस्थित अतिथिकें गर्दनिमे मैथिल समन्वय समितिक श्वेत परिधान पहिराय स्वागत कयलनि। हीरा हमराही एवम् प्रिया झा अपन टीमक संग आकर्षक सांस्कृतिक कार्यक्रम प्रस्तुत कय दर्शकवृन्दकें हर्षोल्लसित कयलनि। सम्पूर्ण कार्यक्रमक लाइव प्रस्तुति समितिक पदाधिकारी के. के. झा (पत्रकार) द्वारा कयल गेल। समारोहक समापनक पश्चात भोजनक उत्तम व्यवस्था छल। सभगोटे एकसंग बैसि गाम-घर जकाँ रूचिपूर्वक सुस्वादु भोजनक आनन्द लेलनि।
मैपुप्र समदियाकेँ समतिक अध्यक्ष राजकुमार झा कहलनि, “मैथिल समन्वय समिति एकटा अनुशासित सुसज्जित टीम अछि। आपसी समन्वय एवम् अद्भुत तालमेल समितिक मुख्य शक्ति अछि। समस्त पदाधिकारी समितिक रत्न छथि। हिनक पुरूषार्थ एवम् विनम्रता नमनीय एवम् प्रेरणादायक अछि। कोनो भी प्रकारक आयोजन चाहे सामाजिक होय किंवा संगोष्ठी, समितिक पदाधिकारीगणक भंगिमा, ऊर्जा, तत्परता देखि समाज आह्लादित होएत छथि। समारोहक सफलताक मुख्य आधार समितिक सम्पूर्ण टीमकें हृदयपूर्वक अभिनंदन करैत छी।”
