मैथिल समन्वय समितिक नवम वार्षिकोत्सव आइ दिनांक १२ जनवरी, २०२५ कें नवी मुंबईक नेरूल स्थित बिहार मित्र मंडल (डाॅ. राजेन्द्र प्रसाद भवन) मे आयोजित होमय जा रहल अछि। वार्षिकोत्सवक तैयारी लगभग अंतिम चरणमे अछि।
एहि संबंधमे मैपुप्र समदियाकेँ मैथिल समन्वय समितिक अध्यक्ष राजकुमार झा जनतब दैत कहलनि, “जनतब दी जे मैथिल समन्वय समितिक स्थापनाक परिकल्पना बिहार मित्र मंडलक एहि सभागारमे १० जनवरी, २०१६ ईस्वीके भेल छल। मैथिल समाजक वरिष्ठ समाजसेवी समेत विभिन्न मैथिल संगठन केर प्रतिनिधिगण सम्मिलित एवम् उपस्थित भऽ एक स्वरसँ अम्ब्रेला ऑर्गनाइजेशन केर रूपमे मैथिल समन्वय समितिक गठन करबाक लेल सहमत भेल छलाह। फलत: १४ जनवरी, २०१६ अर्थात मकर संक्रान्तिक दिन समिति सामाजिक अस्तित्व प्राप्त कयलक।”
ओ आगू कहलनि, “गठनक उपरांत समिति द्वारा तीन-तीन सफल वर-वधू परिचय सम्मेलन, अपन संस्थापक संयोजक दिवंगत धीरज चन्द्र झाक स्मृतिमे “धीरज प्रतिभा सम्मान” विजनेश कनक्लेव, मिथिला रोजगार मेला आदिक सफलतापूर्वक आयोजन कयलक। नवम वार्षिकोत्सवमे पाँच वरिष्ठ समाजसेवीकें “प्रेरणा-सम्मान” सम्मानोपधि द्वारा सम्मानित कयल जायत। वरिष्ठ समाजसेवी छथि – रमा झा, सतीश चन्द्र झा, महेश झा, बलवंत शास्त्री एवम् अशोक सिन्हा। एकर अतिरिक्त एक विलक्षण सेमिनारक आयोजन कयल जायत। सेमिनारक विषय अछि – मुंबई प्रवासी मैथिल समाज एवम् समन्वय।” विभिन्न संगठनक प्रतिनिधिगण सेमिनारमे सहभागी बनि अपन विचार प्रस्तुत करता। वार्षिकोत्सवमे शामिल हेबाक लेल आमंत्रण-पत्र पठाओल जा चुकल अछि।”
