मुजफ्फरपुर जिलाक सिकंदरपुर थाना क्षेत्रमे एकटा सनसनीखेज मामिला सामने आयल अछि जतय एकटा महिलाक संग जबरदस्ती बलात्कारक प्रयास आ विरोध कयला पर ओकरा पर तेजाब फेंकय केर आरोप छैक। पीड़िता थानामे नामित प्राथमिकी दर्ज कs कड़ा कारवाई केर मांग कयलक अछि। पुलिस एहि मामिलाक जांच शुरू कs देलक अछि।
पीड़ित महिलाक आरोप अछि जे शुक्रदिन भोरमे जखनि ओ अपन कोठलीमे सुतल छलीह तखनि हुनकर बहिनोई जबरदस्ती घरमे घुसि गेल। ओ घरमे घुसि कs ओकरा संग दुष्कर्म करबाक प्रयास कयलक। महिला जखनि विरोध कयलक तs आरोपी ओकरासँ मारि-पीटि करय लागल आ फेर अपना संग आनल तेजाबसँ ओकरा पर हमला कयलक। एहि हमलामे महिला झुलसि गेल। घटना केर समय महिलाक पति घरसँ बाहर छलाह। पीड़िताक अनुसार आरोपी असगर पाबि अपराध करबाक प्रयास कयलक। घटनाक तुरंत बाद पीड़िता थानामे शिकायत दर्ज करौलक।
एहि मामिलामे डीएसपी टाउन सीमा कुमारी बतओलनि महिलासँ आवेदन भेटल अछि जाहिमे ओ तेजाब फेंकबाक आ बलात्कारक प्रयासक आरोप लगेने छथि। मुदा एखनि धरि जांचमे तेजाब फेंकबाक आ बलात्कारक पुष्टि नहि भेल अछि। ई मामिला शुरूमे कोनो पारिवारिक विवादसँ जुड़ल बुझाइत अछि।
डीएसपी कहलनि जे, पीड़िता आ आरोपीक बीच पहिनेसँ पारिवारिक विवाद चलि रहल अछि। जांचमे इहो पता चलल अछि जे आरोपीक पत्नी किछु समयसँ लापता अछि, आओर ओहि पर सेहो दुनू पक्षक बीच विवाद अछि। स्थानीय लोकसँ पूछताछ कयलाक बाद तेजाब फेंकबाक पुष्टि नहि भs सकल। पुलिस पूरा घटनाकेँ बारीकीसँ जांच कs रहल अछि आओर सबूत इकट्ठा करय केर प्रयास कऽ रहल अछि।
