म.प्र. पूर्व डी.आइ.जी. अखिलेश झा बनलाह इंटरनेशनल पुलिस एकेडमी, ब्रुसेल्सक मानद निदेशक
म.प्र. पूर्व डी.आइ.जी. अखिलेश झा बनलाह इंटरनेशनल पुलिस एकेडमी, ब्रुसेल्सक मानद निदेशक
*
मध्यप्रदेश पुलिसक पूर्व वरिष्ठ अधिकारी अखिलेश झाकेँ इंटरनेशनल पुलिस एकेडमी (UNIPOL), ब्रुसेल्स (बेल्जियम) द्वारा भारत प्रभाग – इंडिया अफेयर्स केर मानद निदेशकक रूपमे नियुक्ति देल गेल अछि। ई प्रतिष्ठित अंतरराष्ट्रीय संस्था, जे वैश्विक स्तर पर पुलिस प्रशिक्षण आ सुरक्षा सहयोगमे अग्रणी अछि, अखिलेश झाकेँ हुनकर पुलिस सेवा, आंतरिक सुरक्षा आ सामुदायिक सेवामे असाधारण योगदानक लेल ई सम्मान प्रदान कयलक अछि।
मानद निदेशकक रूपमे झा UNIPOLक मिशन आ उद्देश्यक प्रतिनिधित्व भारत आ वैश्विक मंच पर करताह। अपन 35 वर्षक समृद्ध अनुभव आ विशेषज्ञताक संग ओ अकादमीक प्रशिक्षण कार्यक्रम, शोध कार्य आ अंतरराष्ट्रीय सहयोगकेँ आओर सशक्त बनेताह। UNIPOL विश्व भरिक पुलिस, सैन्य आ सुरक्षा अधिकारी सभकेँ साइबर अपराध, आतंकवाद, मानव तस्करी आ संगठित अपराध जेकाँ समकालीन चुनौतीसँ निपटबाक लेल नवोन्मेषी दृष्टिकोण आ वैश्विक सहयोगक प्रोत्साहन दैत अछि।
अखिलेश झाक पुलिस सेवा काल उपलब्धिसँ भरल रहल अछि। 1989 मे 33 डिप्टी एस.पी. सभमे सर्वश्रेष्ठ प्रशिक्षु अधिकारी घोषित होयबाक लेल हुनका गवर्नर्स गोल्ड मेडल भेटल। 2013 मे उत्कृष्ट पुलिस प्रदर्शनक लेल प्रेसिडेंट्स मेरिटोरियस अवार्डसँ सम्मानित भेलाह। मध्यप्रदेशक 51 पुलिस अधीक्षक सभमे हुनका सर्वश्रेष्ठ एस.पी. घोषित कयल गेल।
1990 सँ 1993 धरि नक्सल प्रभावित बस्तर (छत्तीसगढ़) क्षेत्रमे उत्कृष्ट कार्यक लेल हुनका केंद्रीय गृह मंत्रालय द्वारा आंतरिक सुरक्षा पुरस्कार सेहो प्राप्त भेल।
पुलिस सेवामे उल्लेखनीय योगदानक क्रममे अखिलेश झा अपन करियरक दौरान अनेक महत्वपूर्ण पद पर कार्य कयलथि। हुनक सेवा यात्रा बीजापुर (छत्तीसगढ़) मे एस.डी.ओ.पी.क रूपमे आरंभ भेल। तदुपरांत ओ झाबुआमे एस.डी.ओ.पी., कटनी, भोपाल, ग्वालियर आ रायपुरमे सी.एस.पी., सिवनी, भिंड, रतलाममे अतिरिक्त एस.पी., पुलिस मुख्यालय (PHQ) मे ए.आइ.जी. प्रशिक्षण, सी.आइ.डी. इंदौरमे एस.पी. ए.जे.के., एस.पी. नारकोटिक्स, हरदा, अलीराजपुर आ इंदौरमे एस.पी. (मुख्यालय) आ इंदौर एवं धारमे आर.ए.पी.टी.सी. कमांडेंटक पद पर कार्य कयलाह।
लेखकक रूपमे हिनक योगदान सेहो सराहनीय रहल अछि। मधुबनी (बिहार) केर मूल निवासी आ वर्तमानमे इंदौरमे निवासरत अखिलेश झा एकटा सिद्धहस्त लेखक सेहो छथि। हुनका द्वारा लिखल तीन पुस्तक प्रकाशित भेल अछि, जाहिमे हुनक चर्चित कृति “Policing in India: Trials and Tribulations” विशेष रूपसँ उल्लेखनीय अछि। एहि पुस्तकमे ओ भारतीय पुलिसिंग प्रणालीक चुनौती आ सुधारक आवश्यकता पर अपन अनुभवक आधार पर गहन विश्लेषण प्रस्तुत कयने छथि।
इंदौर आ मध्यप्रदेशक पुलिस बिरादरी अखिलेश झाक एहि प्रतिष्ठित नियुक्ति पर हार्दिक बधाई देलक अछि आ एहिमे राज्यक लेल गौरवक क्षण बतौलक अछि।
पूर्वोत्तर सांस्कृतिक संस्थान, मध्यप्रदेशक प्रदेश अध्यक्ष ठाकुर जगदीश सिंह आ महासचिव के. के. झा अपन प्रसन्नता व्यक्त करैत कहलनि —
“श्री झाक नियुक्ति बिहार मूलक लोकनिमित्त गर्वक अवसर अछि। ई उपलब्धि युवा सभकेँ लोक सेवा आ सुरक्षा क्षेत्रमे उत्कृष्टता हासिल करबाक प्रेरणा दैत अछि।”