काल्हि बृहस्पतिकेँ रांटी पेड़ा चौक पर दिनक ९:४० बजे मधुबनी-रामपट्टी मुख्य मार्ग बाधित छल। स्थानीय लोकसभ द्वारा पिबय वला जलक समुचित व्यवस्था नहिं हेबाक कारणसँ यातायात रोकल गेल। जाहि कारणसँ आम लोक बहुत परेशान भेलाह। सड़कक बीचों बीचमे एकटा ट्रैक्टर केर ओकर ढाला संग ठाढ़ कयल गेल आ बांस बल्लासँ यात्रा मार्ग अवरुद्ध भेल। स्थानीय लोकक कहब छल जे पिछला बेर सेहो पानिक समस्या छल मुदा मेयर केर चुनावक कारण टैंकरसँ जलक आपूर्ति होइत छल। एही बेर सेहो चापाकलमे जल नहिं अछि मुदा नगर निगम क्षेत्र द्वारा कोनो व्यवस्था नहिं कयल गेल। बेसी जलक आपूर्ति तऽ छोड़ू हम सब पिबयवला जलक लेल परेशान छी। एहेनमे हमरा सभ लग दोसर कुनु आन उपाय नहिं अछि।
जनतब जे मधुबनी-रामपट्टी मुख्य मार्ग लगभग दू घंटा तक बाधित रहल। जाहि कारणसँ राहगीरकेँ बहुत ज्यादा परेशानी भेल। मधुबनी जाय वला लोकसभकेँ पिलखबार होयत मधुबनी जाय पड़ल, ओतय रामपट्टी जाय वला लोकसभकेँ वापस मधुबनीसँ कोतवाली चौक होइत या पिलाखबार होइत जाय पड़ल। प्रशासनक आश्वासन देलाक बाद सड़क लगभग १२ बजे पुनः आवागमन हेतु बहाल भेल।
जलक समस्या मधुबनी जिलामे बहुत बेसी भयावह स्थिति उत्पन्न कय रहल अछि। जमीनमे जलक श्रोत लगभग समाप्त अछि। पोखरि इनार कतौह नहिं बांचल अछि। भविष्यमे हालत आओर बत्तर होयत। समय रहैत एकर निराकरण नहिं भेल तऽ बुन्द बुन्द लेल सभ तरसत।
