मैथिली साहित्यिक एवं सांस्कृतिक समिति द्वारा मनाओल गेल ‘यात्री जयंती’। सोज टापर ग्रूप डान्स स्कूल, स्टेशन रोडक सभागारमे’ ‘यात्रीजीक साहित्यमे मिथिला आओर मैथिली’ बिषय पर सुभेश चन्द्र झाक अध्यक्षतामे संगोष्ठीक आयोजन कयल गेल।
संगोष्ठीमे विचार व्यक्त करैत मैथिलीक वरिष्ठ साहित्यकार दिलीप कुमार झा कहलनि जे यात्री – नागार्जुनक लेखन मिथिला मैथिलीक विकासक आधार स्तंभ अछि।यात्री जीक माध्यमसँ मिथिलाकें अखिल भारतीय पहचान प्राप्त भेल। ओ नब तुरकें आगाँ अनबाक प्रबल समर्थक छलाह। तेँ ओ कहलनि ‘नबतुरिये आबओ आगाँ। से नबतुरिया सब आगाँ आबथि ।करथि रूढ़ि भंजन।’
डा.श्रीदेव लाल कर्ण कहलनि जे नागार्जुन-यात्रीक साहित्यकें अगिला पीढ़ी धरि पहुंचेबाक जरूरत अछि।संगोष्ठीमे चण्डेश्र्वर खाँ, ऋषिदेव सिंह, गोपाल झा अभिषेक, कमलेश प्रेमेन्द्र, सुनील कुमार मिश्र, अमित कुमार आ उमेश मुखिया सेहो अपन विचार व्यक्त कयलनि।
संगोष्ठीक बीचहिमे मैथिली-हिन्दी केर प्रसिद्ध पत्रकार आ साहित्यकार शरदिन्दु चौधरीक पटनामे निधनक खबरि भेटलापर सभ स्तब्ध भ’ गेल।हुनक निधनसँ मैथिलीकें अपूरणीय क्षति भेल अछि। शोक संवेदना व्यक्त कयल गेल। संगोष्ठी दिसिसँ दू मिनटक मौन राखि हुनक समवेत श्रद्धांजलि देल गेल।
