केंद्रीय मंत्री शिवराज सिंह कहलथि कि ग्रामीण विकास विभागक योजनाक लाभ बिहारक जनताकेँ देल जाएत। पीएम मोदीक हाथें 520000 नव सुकृत मकानक लाभ देल जाएत। आठ हजार करोड़क लागतसँ मकानक निर्माण कयल जाएत।
पटनामे सचिवालय स्थित सभागारमे बैठकक बाद शनिकेँ केंद्रीय मंत्री शिवराज सिंह चौहान कहलथि कि बिहारक विकासक लेल केंद्र सरकारक जरिए अनेक सौगात बिहारक लोककेँ देल गेल अछि। 24 अप्रैलकेँ पंचायती राज दिवस अछि आ ओहि दिन एक बेर फेर प्रधानमंत्री नरेंद्र मोदी बिहारक जनताकेँ अनेक सौगात देबाक लेल आबि रहल छथि। पंचायती राजक चुनल प्रतिनिधिक सम्मेलन होएत, ओहिसँ पूरा देश जुड़त। बहुत रास योजनाक उद्घाटन आ शिलान्यास होएत।
केंद्रीय मंत्री कहलथि कि ग्रामीण विकास विभाग केर योजनाक लाभ सेहो बिहारक जनताकेँ देल जाएत। गेल वर्ष गरीब लोकनि के 7 लाख 90 हजार मकान पीएम आवास योजनाक अंतर्गत लोककेँ देल गेल छल। 5 लाख 20 हजार मकान जे बचल छल ओहो देल जायत।
मधुबनीमे लाखोंक संख्यामें लोक आओत, ऐतिहासिक कार्यक्रम होएत। बिहार सरकारक कामकाजक केंद्रीय मंत्री शिवराज सिंह चौहान प्रशंसा कएलनि. ओ कहैत छथि कि ग्रामीण विकास योजना केर बिहारमे बहुत बेहतर कार्यान्वयन भ’ रहल अछि। हम बिहार सरकारकेँ बधाई दैत छी, बिहारमे 3 लाख शसँ बेसी लखपति दीदी बनि चुकल छथि आ एही वर्ष 20 लाख बनय केर लक्ष्य राखल गेल अछि।
जनतब जे 24 अप्रैलकेँ पंचायती राज दिवस पर पीएम मोदीक मिथिला क्षेत्रीय बिहारक मधुबनीमे होएवाला कार्यक्रमक तैयारीक जायजा लेल केंद्रीय मंत्री शिवराज सिंह शनिकेँ बिहार दौरा पर आएल छथि। पीएम मोदी मधुबनी, दरभंगा, सीतामढ़ी, शिवहर, सीतामढ़ी, समस्तीपुर समेत 10 जिलाक पंचायत प्रतिनिधि सभकेँ संबोधित करताह। एहि लेल शिवराज सिंह पटना पहुँचि बीजेपी कार्यालयमे एनडीए केर तमाम पैघ नेता सभ संग पीएम केर कार्यक्रमक बारेमे चर्चा कएलनि. केंद्रीय पंचायती राज मंत्री ललन सिंह सेहो बैठकमे उपस्थित छलथि।
