मधेपुराक सिंहेश्वर थाना क्षेत्रक गम्हरिया रोड स्थित पुलिस लाइनक सामने निर्माणाधीन घरमे शौचालय केर टंकीक शटरिंग खोलयकेँ दौरान शनिदिन दूटा मजदूरक दम घुटलासँ मृत्यु भs गेल, जखनि कि एकटा मजदूरक हालत गंभीर बनल अछि। विजय भगतक निर्माणाधीन मकानमे हादसा भेल अछि । मृतक केर पहिचान सिंहेश्वर थाना क्षेत्रक लालपट्टी वार्ड 1 निवासी सहदेव यादव केर बेटा प्रमोद यादव (55) आ बुढ़ाबे निवासी दिलीप चौहान (40) केँ रूपमे कयल गेल अछि। तेसर मजदूरक मधेपुरा मेडिकल कॉलेज अस्पतालक आईसीयूमे इलाज भs रहल अछि।
प्रत्यक्षदर्शीक अनुसार शनिदिन भोर करीब 9 बजे दू टा मजदूर शटरिंग खोलय लेल निर्माणाधीन घरक शौचालयक टंकीमे उतरल। बहुत देर धरि कोनो प्रतिक्रिया नहि भेटलाक बाद तेसर मजदूर टंकीमे गेल मुदा ओहो बाहर नहि आबि सकल। एकर बाद मकान मालिकक कर्मचारी मुकेश कुमार रस्सीक सहयोगसँ टंकीमे उतरि बेहोश भऽ गेल। मुदा तुरंत हुनका बाहर निकालि कऽ इलाज लेल अस्पताल पठा देल गेल, जतय हुनकर हालत सामान्य बताओल जा रहल अछि। पुलिस आ स्थानीय लोकक मददिसँ बाकी तीन गोटेकेँ बाहर निकालि तुरंत मधेपुरा मेडिकल कॉलेज अस्पताल पहुंचाओल गेल, जतय डॉक्टर प्रमोद यादव आओर दिलीप चौहानकेँ मृत घोषित कs देलनि. तेसर मजदूर केटावन निवासी संतोष कुमारक इलाज जारी अछि।
सिंहेश्वर थानाध्यक्ष वीरेन्द्र राम बतौलनि सेप्टिक टंकीमे शटरिंग खोलैत काल दम घुटलाक कारण दुर्घटना भेल। दुनू मृतकक शव पोस्टमार्टम लेल सदर अस्पताल पठाओल गेल अछि। पुलिस एहि मामिलाक गंभीरतासँ जांच कs रहल अछि. दोसर दिसि मेडिकल कॉलेज अस्पतालक प्रभारी उप अधीक्षक डॉ. अंजनी कुमार कहलनि जे, जखन सेप्टिक टैंक बहुत दिन धरि बंद रहैत अछि तs ऑक्सीजन केर कमी आ ओहिमे जहरीला गैसक जमाव भs जाइत अछि। एहन स्थितिमे बिना सुरक्षा उपकरणक भीतर गेला पर दम घुटय केर स्थिति पैदा भs जाइत अछि। एकर कारण दू मजदूरक मौका पर मृत्यु भs गेल आ एकटा केर हालत गंभीर बनल अछि।
एतय दुर्घटनाक बाद मृतकक गाममे मातम पसरल अछि । कारण परिवारक लोककेँ कानि-कानि कs खराब हालत अछि। स्थानीय लोकक कहब छनि जे एहेन जोखिम भरल काजमे सेहो सुरक्षाक उपाय केर अनदेखी कएल जाइत अछि जे सीधा मजदूरक जानसँ खेलवार होईत अछि।
