मधेपुरासँ बहुत दुखद खबर आयल अछि। जतय घरेलू विवाद एकटा परिवारकेँ समाप्त कs देलक। पतिसँ झगड़ा भेलाक किछुए देर बाद एकटा महिला अपन दूनू बेटीक संग जहर खा कए आत्महत्या कs लेलक।
ई घटना मुरलीगंज थाना क्षेत्रक बेलोडीह वार्ड ३ मे भेल अछि।मृतक बेलोडीह वार्ड नम्बर ४ निवासी राजेश राम आ हुनक पत्नी चंदन देवी (२६), राजकुमारी (५), रागिनी (३) अछि । कहल जा रहल अछि जे कोनो बात पर पति-पत्नीमे विवाद भेल छल। जकर बाद पत्नी अपन दुनू बच्चाक संग जहर खा कs आत्महत्या कs लेलक। रविकेँ राति जखन पति काजसँ घर घुरलाह तँ हुनका एहि घटनाक जानकारी भेटल ।
कहल जा रहल अछि जे रविकेँ कोनो बात पर पति-पत्नीमे बहस भेल छल। ई विवाद एतेक बढ़ि गेल जे चंदन देवी आहत महसूस करैत क्रोधमे ई आत्मघाती डेग उठौलनि
पहिने दुनू बच्चाके जहर खुआ देलखिन आ फेर स्वयं जहर खेलक। एकर बाद ओ गहूम कटबा लेल खेत दिसि गेलीह। खेतमे जखन चक्कर आबय लागल तs घर घुरि गेलीह। स्थानीय लोकक कहब छलनि जे पति-पत्नीमे अक्सरहां छोट-छोट बात पर झगड़ा होइत छल, मुदा विवाद एतेक बढ़ि जायत से कियो सोचने नहि छल। तीन जिंदगि एक संग अंतसँ पूरा गाम गहींर शोकमे डूबल अछि।
घटनाक जानकारी भेटला पर मुरलीगंज थानाक पुलिस मौका पर पहुंचि तीनू शवके पोस्टमार्टमक लेल मधेपुराक सदर अस्पताल पठा देलक आ मामिलाक जांच चलि रहल अछि। वर्तमानमे आपसी विवादक बात सोझाँ आबि रहल अछि।
