माँ शारदे फाउंडेशन ठाणे एवं बालकुम छठ पूजा समिति संगहि महाराष्ट्र राज्य पत्रकार संघक तत्वावधानमे, श्रावणी सोमदिनक पावन अवसर पर तीर्थक्षेत्र भीमाशंकरमे विशाल महाभंडाराक आयोजन कएल गेल। श्रावण मासक सोमवारीक अवसर पर श्रद्धालु लोकनिक भीड़, भीमाशंकरमे देखल गेल। प्रशासन पूर्ण रूपेण तत्पर छल, भक्त आ श्रद्धालु लोकनिक सहायताक लेल विभिन्न स्थान पर सहायता केंद्र संगहि पोलिस बलक तैनाती देखल गेल।
भीमाशंकर महादेव, बारह ज्योतिर्लिंगक एकटा रूप छथि त’ भक्तगण अत्यधिक परिश्रम करैत बाबाक दर्शन लेल घंटो धरि कतारमे ठाढ़ रहैत बाबा नामक उद्घोष करैत देखल गेलाह।
संस्थाक तमाम पदाधिकारी संगहि सेवाधारी रविदिन मुंबईसँ प्रस्थान कएलनि, तदुपरांत सोमदिन प्रातःकालसँ महाप्रसादक वितरण प्रारम्भ भेल। सोमदिन प्रातःकाल आठ बजेसँ संध्याकाल आठ बजे धरि, ई महाप्रसाद वितरण चलैत रहल । महाप्रसाद ग्रहण करबाक लेल भक्तजनक उत्साह सेवाधारी सभकेँ प्रोत्साहित करैत रहल, फलस्वरूप लगभग पांच – सात हजार लोकनिक सेवा संभव भेल। पंक्तिमें, बच्चा, युवा, वृद्ध, महिला पुरुष सभक सहभागिता संतोषप्रद छल, आ बीच – बीचमे हर हर महादेवक जयघोष, तीर्थक्षेत्रक वातावरणकेँ भक्तिमय करबाक लेल पर्याप्त छल।
सेवाधारी सभक संगहि स्थानीय प्रशासनिक सहयोगसँ ई पवित्र कार्यक्रम भक्तिमय वातावरणमे संपन्न भेल। जनतब दी जे एहि संस्था द्वारा हर वर्ष एहि तरहक कार्यक्रम कएल जाइत रहल अछि। समितिक पदाधिकारीमे राकेश कुमार झा, अतुल तिवारी, पंकज झा, प्रमोद झा, धर्मेंद्र कुमार झा, शिवानंद मिश्र, अमित सिंह, मीतू सिंह, अरुण देशमुख, नितिन अग्रवाल, संजीत मिश्र, अनिल राणे, निखिल जामसांडेकर, अजय चौरसिया संगहि आनो आन सेवाधारी एहि कार्यक्रमक सफलताक लेल तत्पर छलथि।
