सम्पूर्ण सातो चरणक औसत मतदान प्रायः ५८.३४%, अंतिम चरणमे ५९% मतदान
*
मधुबनी समदिया
*
लोकसभा चुनावक सातम आ अंतिम चरणक मतदान काल्हि सात राज्य आ एकटा केंद्र शासित प्रदेशक संग ५७ लोकसभा सीटपर औसतन ५९ प्रतिशत मतदानक संग समाप्त भऽ गेल। जाहिमे वाराणसी सम्मिलित अछि, जतयसँ प्रधानमंत्री नरेन्द्र मोदी लगातार तेसर बेर चुनाव लड़ि रहल छथि। जाहि सात राज्यमे लोकसभा चुनावक लेल काल्हि मतदान भेल ओ राज्य अछि चंडीगढ़क ०१,पंजाबक सभ १३ आ हिमाचल प्रदेशक ०४, उत्तर प्रदेशक १३, पश्चिम बंगालक ०९, बिहारमे ०८, ओडिशामे ०६ आ झारखण्डक ०३ सीटपर मतदान भेल।
लोकसभा चुनावक अंतिम चरणमे पंजाबमे ५५.२० प्रतिशत, बिहारमे ४८.८६ प्रतिशत, चंडीगढ़मे ६२.८० प्रतिशत, हिमाचल प्रदेशमे ६७.५६ प्रतिशत, झारखण्डमे ६७.९५ प्रतिशत, ओडिशामे ६२.४६ प्रतिशत, पंजाबमे ५५.२० प्रतिशत, उत्तर प्रदेशमे ५४.०० प्रतिशत आ पश्चिम बंगालमे ६९.८९ प्रतिशत मतदान भेल। सातम आ अंतिम चरणक बाद लोकसभा चुनाव २०२४ लगभग ५८.३४ प्रतिशत मतदानक संग संपन्न भेल।
जनतब जे ओडिशाक शेष ४२ विधानसभा क्षेत्रक लेल मतदान आ हिमाचल प्रदेशक ०६ विधानसभा सीटक उपचुनाव सेहो एकहि संगे कैल ख़त्म भेल।
