रक्षा सचिव राजेश कुमार सिंह सोमदिन पीएम नरेंद्र मोदीसँ भेंट कएलनि। जम्मू-कश्मीरक पहलगाममे भेल आतंकी हमलाक बाद पीएम मोदी निरंतर सम्पूर्ण स्थिति पर नजर राखि रहल छथि। पीएम सम्पूर्ण मामिला पर तीनू सेनाक प्रमुखसँ बैसार सेहो कए चुकल छथि। मानल जा रहल अछि जे रक्षा सचिवसँ सोमदिन भेल एहि भेंटक दौरान पीएमकेँ ताज़ा हालात आ सैन्य तैयारीक जानकारी देल गेल।
तहिना, सोमदिन नई दिल्लीमे जापानक रक्षा मंत्री भारतक रक्षा मंत्रीसँ भेंट कएलनि।
जनतब जे रविकेँ भारतीय वायुसेनाक प्रमुख एयरचीफ मार्शल एपी सिंह प्रधानमंत्री मोदीसँ पीएम आवास पर भेंट कएलनि। मानल जा रहल अछि जे वायुसेना प्रमुख प्रधानमंत्रीकेँ वर्तमान स्थिति आ एयरफोर्सक तैयारीसँ अवगत करौलनि। ई भेंट करीब 40 मिनट धरि चलल। ओतय शनिकेँ नौसेना प्रमुख प्रधानमंत्री मोदीसँ भेंट कएलनि।
एही बीच सोमदिन भारतक रक्षा मंत्री राजनाथ सिंह आ जापानक रक्षा मंत्री जनरल नाकातानीक बीच एकटा महत्वपूर्ण भेंट भेल। नई दिल्लीमे भेल एही भेंटक दौरान जापानी रक्षा मंत्री भारतकेँ अपन समर्थन देलनि। ओ बतेलनि जे जापान भारतक संग ठाढ़ अछि। भारत आ जापानक रक्षा मंत्रीक एही महत्वपूर्ण बैसारमे जम्मू-कश्मीरक पहलगाममे भेल आतंकवादी हमलाक चर्चा सेहो भेल। जापानक रक्षा मंत्री नाकातानी पहलगाम हमलाक मामिलामे भारतक संग अपन एकजुटता व्यक्त कएलनि।
एहीसँ पहिने भारतमे जापानक राजदूत ओनो केइचीकेँ रक्षा सचिवसँ भेंट भेल छल। पहलगाममे भेल आतंकवादी हमलाक बाद नई दिल्लीमे रक्षा सचिव राजेश कुमार सिंहसँ ई भेंट भेल छल। एही बैसारक दौरान जापानक राजदूत जम्मू-कश्मीरमे भेल आतंकवादी हमलाक संदर्भमे भारतसँ एकजुटता व्यक्त कयलनि। ओ पहलगाममे भेल आतंकी हमला समेत आतंकवादक सभ तरहक रूपकेँ कड़ी निंदा कयलनि। जनतब जे पाकिस्तानी सेना नियंत्रण रेखा पर संघर्ष विरामक लगातार उल्लंघन कय रहल अछि। जापानक रक्षा मंत्री फिलहाल भारतमे छथि आ एही बीच 4-5 मईकेँ रातिमे सेहो पाकिस्तानी सेना नियंत्रण रेखा पर गोलीबारी कयलक।
पाकिस्तान बीतल 11 दिनसँ नियंत्रण रेखा पर फायरिंग कय रहल अछि। सेनाक अनुसार 4-5 मईकेँ राति पाकिस्तानी सेनाक चौकी सभ जम्मू-कश्मीरक कुपवाड़ा, बारामूला, पुंछ, राजौरी, मेंढर, नौशेरा, सुंदरबनी आ अखनूरक चारू दिस नियंत्रण रेखाक पारसँ गोलीबारी कय रहल अछि।
