आगामी लोकसभा चुनावक लेल बिगूल बाजि गेल अछि। शुक्र दिन तक नामांकनक तारीख समाप्त भेला केर बाद एहन स्थितिमे निष्पक्ष आओर निर्भीक मतदानक लेल अपराधीक पहचान कय जिला आ थाना बदर कयल जा रहल अछि।संगहि लोकसभा चुनाव 2024 केर ध्यानमे राखि जिलाक सीमा पर सेहो लगातार निगरानी गश्त कएल जा रहल अछि। पुलिस आ निषेध विभागक संयुक्त प्रयाससँ शराब व्यापारीकेँ खिलाफ छापामारी अभियान चलाओल जा रहल अछि। एही क्रममे 16 मार्च सँ 19 अप्रैल धरि निषेध विभाग द्वारा कुल 2728.83 लीटर शराब आ 22 गाड़ी जब्त कएल गेल अछि। आबकारी विभाग आ पुलिस विभाग द्वारा कुल 8317.415 लीटर शराब नष्ट सेहो कयल गेल। जाहिमे 6804.85 लीटर पुलिस विभाग द्वारा आ निषेध विभाग द्वारा 1512.565 लीटर शामिल अछि। निषेध विभाग सहरसा द्वारा तीन टीम बनाओल गेल अछि। गठित टीम सब गाड़ीक जांच, शराबी आ बेचय वालाकेँ सख्त निगरानी करैत अछि। संगहि ड्रोनक माध्यमसँ तस्करी शराबक मांद केर पता लगा कय छापामारी सेहो कएल जाइत अछि। जिलामे सड़क पर नाटकक माध्यमसँ सेहो नशा मुक्तिक बारेमे प्रचार भऽ रहल अछि।