लेफ्टिनेंट जनरल पुष्पेन्द्र सिंह भारतीय सेनाक वाइस चीफ ऑफ आर्मी स्टाफक पदभार संभालनि। पैरा रेजिमेंट (विशेष बल) केर 4 बटालियनसँ संबंधित एहि वरिष्ठ अधिकारीकेँ दिसंबर १९८७मे कमीशन कयल गेल छल।
पुष्पेन्द्र सिंह ला मार्टिनियर कॉलेज, लखनऊ, लखनऊ विश्वविद्यालय आ भारतीय सैन्य अकादमी, देहरादूनमे पढ़ाई कयने छथि। एकटा युवा अधिकारीक रूपमे सेकेंड लेफ्टिनेंट पुष्पेन्द्र सिंह भारतीय शांति रक्षा बलक तहत श्रीलंकामे संचालित अभियानक दौरान अपन बटालियनमे शामिल भऽ गेल छलाह। 4 पैरा केँ अक्टूबर १९८७ मे श्रीलंकामे तैनात कयल गेल छल, जतय जाफना आ बादमे किलिनोच्चीमे महत्वपूर्ण अभियानमे भाग लेलनि। २२ जुलाई १९८९ केँ सेकेंड लेफ्टिनेंट पुष्पेन्द्र सिंह ईरामाडुसँ किलिनोच्ची धरि १३ सदस्यीय क्विक रिएक्शन टीमक नेतृत्व कय रहल छलाह।
वाइस चीफ ऑफ आर्मी स्टाफक पदभार संभालबाक अवसर पर लेफ्टिनेंट जनरल पुष्पेन्द्र सिंह एहि शुभ क्षणक साक्षी बनय लेल पांच शहीदक परिवार आ वीरकेँ आमंत्रित कयलनि। शहीदक परिवारक संग राष्ट्रीय युद्ध स्मारकक दर्शन कय शाश्वत ज्वालाकेँ श्रद्धांजलि देलनि आ त्याग चक्र पर माल्यार्पण कयलनि जतय एहि अभियानमे शहीद भेल पांच वीर सैनिकक नाम अंकित अछि।
ओ कश्मीर घाटी आ नियंत्रण रेखा पर एकटा विशेष बल इकाईक कमान सेहो संभारने छलाह। एकर बाद नियंत्रण रेखा पर ऑपरेशन स्नो लेपर्ड केर दौरान एकटा इन्फैंट्री ब्रिगेड आ एक माउंटेन डिवीजनकेँ कमान संभारलनि। हिमाचल प्रदेशमे स्थित एकटा कोरक जनरल ऑफिसर कमांडिंग सेहो छलाह, जे जम्मू, साम्बा आ पठानकोट सन संवेदनशील इलाकाक सुरक्षाक जिम्मेदारी लैत छल। हुनका पश्चिमी आ उत्तरी सीमाक परिचालन परिदृश्यक विशाल ज्ञान आ रणनीतिक समझ अछि।
