मुजफ्फरपुरक अदालतमे एक याचिका दायर कएल गेल अछि। एहिमे सीएम नीतीश कुमार पर पटनामे एकटा कार्यक्रमक दौरान राष्ट्रगान केर अनादर करबाक आरोप लगाओल गेल अछि। सीएम नीतीश कुमार खिलाफ मुजफ्फरपुरक सीजीएमकेँ पश्चिमी अदालतमे अधिवक्ता सूरज कुमार द्वारा परिवाद दायर कएल गेल अछि।
जनतब जे एकटा कार्यक्रमक दौरान नीतीश कुमार द्वारा राष्ट्रगानक अपमानक मामिलामे परिवाद दायर कराओल गेल अछि। सीएम नीतीश कुमारक कार्यक्रमक दौरान एकटा वीडियो तेजीसँ वायरल भ’ रहल अछि। ई मामिला अदालतमे पहुँच गेल अछि। राजधानी पटनामे एकटा खेल समारोहक उद्घाटनक समय राष्ट्रगानक लेल सभ ठाढ़ छलथि, मुदा राष्ट्रगानक बीचेमे मुख्यमंत्री पत्रकारसभक अभिवादन करय लगलाह आ बगलमे ठाढ़ वरिष्ठ अधिकारीकेँ सेहो इशारा कयलथि, जकरा राष्ट्रगानक अपमान कहि मुजफ्फरपुरक अधिवक्ता सूरज कुमार बीएनएस केर धारा-352 आ 298 क’ आधार पर मुकदमा दर्ज कयलनि। अदालत 28 मार्चकेँ सुनवाईक तिथि तय कयलक।
एही मामिलामे अधिवक्ता सह परिवादी सूरज कुमार बतौलनि, मुख्यमंत्री नीतीश कुमार पटनामे एकटा उद्घाटन कार्यक्रमक दौरान मुख्य अतिथिक रूपमे रहथि। एकर दौरान राष्ट्रगानसँ कार्यक्रमक शुरुआत भेल। मुदा देखल गेल जे सीएम नीतीश कुमार अजीबोगरीब हरकत कए रहल छलथि आ ओहि समय राष्ट्रगान गाओल जा रहल छल।
