पुलिस आ एसएसबीक संयुक्त टीम लखीसरायक मनियारा जंगलमे नक्सलीक एकटा पैघ साजिशकेँ नाकाम कs हथियारक विशाल भंडार बरामद कयलक अछि। पिरीबाजार थाना क्षेत्र अन्तर्गत कठोतिया, मनियारा आ हदहदियाक जंगलमे विशेष तलाशी अभियानक दौरान ई भेल अछि।
गुप्त सूचनाक आधार पर ई अभियान कयल गेल छल। सुरक्षा बलकेँ एहि बातक इनपुट भेटल छल कि नक्सली एगो बड़का घटनाक योजना बना रहल अछि, आओर एहि लेल जंगलमे हथियार नुका कs राखल गेल अछि । एहि जानकारीक आधार पर पुलिस आ एसएसबी टीम पूरा इलाकामे गहन तलाशी अभियान चला देलक।
जनतबक अनुसार तलाशीक दौरान टीमकेँ जमीनक नीचा नुकायल घातक हथियार आ विस्फोटक सामग्री भेटल। बरामद भेल सामानमे एकटा मास्केट, आठटा जिंदा कारतूस, 13टा नॉन-इलेक्ट्रिक डिटोनेटरक संग-संग नौटा लेवी बुक्स, इंसास आ एलएमजीक मैगजीन शामिल अछि। पुलिसक मानब अछि जे नक्सली एहि हथियारक इस्तेमाल सुरक्षा बल वा नागरिक पर हमला करय लेल कs सकैत छल । सुरक्षा बल अत्यंत सतर्कता आ सावधानीक संग एहि हथियारकेँ बरामद कयलक, जाहिसँ कोनो तरहक दुर्घटना टलि गेल।
एहि अभियानमे कोनो नक्सली मौका पर नहि पकड़ल गेल। जंगलक भीतरसँ सभ भागि गेल। हालांकि एसपी अजय कुमार कहलनि जे, नक्सलीक पहिचान भs गेल अछि आ ओकरा गिरफ्तार करय लेल लगातार छापामारी कयल जा रहल अछि। एसपी इहो कहलनि जे एहि अभियानसँ ई स्पष्ट अछि जे नक्सली एक बेर फेरसँ एहि इलाकामे अपन नेटवर्क सक्रिय करयकेँ कोशिशमे छल, मुदा पुलिसकेँ समय पर कारवाईक कारण ओकर योजना असफल भs गेल।
एसपी अजय कुमार स्पष्ट कयलनि जे नक्सलिक खिलाफ एहि अभियानकेँ आब आर तेज कएल जायत। ओ कहलनि जे जिलामे शांति, सुरक्षा आ विकासकेँ हानि पहुँचाबै वला कोनो प्रयासकेँ बर्दाश्त नहि कएल जायत। नक्सल प्रभावित क्षेत्र सभमे सघन निगरानी आ गश्ती बढ़ा देल गेल अछि।
