पूर्व केन्द्रीय रेल मंत्री लालू प्रसाद यादवक विरुद्ध मोकदमा दायर करबाक स्वीकृति गृह मंत्रालय दऽ देलक अछि। सीबीआई केर आरोपपत्रमे लालू सहित 78 लोकक नाम अछि।
लैंड फॉर जॉब घोटाला मामिलाक सुनवाई सोमदिन (१७ फरवरी) अदालतमे भेल। एहि दौरान सीबीआई अदालत द्वारा मांगल गेल स्पष्टीकरण दाखिल करबाक लेल किछु समय माँग कयलक, जकर बाद अदालत सुनवाई स्थगित कऽ देलक। एहि मामिलाक अगिला सुनवाई आब २१ फरवरीकेँ होयत। सीबीआई लालू प्रसाद यादव सहित ७८ लोकक खिलाफ अदालतमे अपन आरोपपत्र दाखिल कयलक अछि।
एहिसँ पहिने लैंड फॉर जॉब घोटाला मामिलाक सुनवाई ७ फरवरीकेँ स्थगित कऽ देल गेल छल। ३० जनवरीकेँ अदालत दूटा अधिकारीपर मुकदमा चलयबाक अनुमति देने छल, जाहिमे सँ एकटा पूर्व प्रशासनिक अधिकारी आर.के. महाजन छथि। जखनि लालू प्रसाद यादव रेल मंत्री छलाह तखनि महाजन रेलवे बोर्डमे छलाह।
एहि मामिलामे बिहारक पूर्व मुख्यमंत्री आ राजद नेता लालू प्रसाद यादव परिवारक पांच सदस्य आरोपी छथि। एहिमे लालू प्रसाद यादव, हुनक पत्नी आ बिहारक पूर्व मुख्यमंत्री राबड़ी देवी, हुनकर बेटा तेजस्वी यादव आ हुनकर दूटा बेटी मीसा भारती आ हेमा यादव सम्मिलित छथि। पछिला सुनवाईक दौरान विशेष लोक अभियोजक डी.पी. सिंह वीडियो कॉन्फ्रेंसिंगक माध्यमसँ अदालतमे उपस्थित भेलाह, जखनि कि बचाव पक्षक वकील मनु मिश्रा अदालतमे शारीरिक रूपसँ उपस्थित छलाह।
जनतब देब जे ई मामिला २००४ सँ २००९ केर बीचक अछि जखनि लालू प्रसाद यादव रेल मंत्री छलाह। आरोपक अनुसार, लालू यादवक मंत्रीक कार्यकालमे रेलवेमे नौकरीक बदलामे आवेदकसँ जमीन आ भूखंड लेल गेल छल। इहो आरोप लगाओल गेल छल जे आवेदकसँ लेल गेल जमीन लालूक पत्नी राबड़ी देवी आ बेटी मीसा भारती’क नाम पर अधिग्रहित कयल गेल छल। केन्द्रीय जांच एजेंसी एहि घोटालामे पूर्व केन्द्रीय रेल मंत्री लालू प्रसाद यादवक विरुद्ध मोकदमा दायर करबाक स्वीकृति माँगलक आ गृह मंत्रालय मंजूरी दऽ देलक।
