बिहारक पूर्व मुख्यमंत्री लालू यादव सोमदिन राष्ट्रीय जनता दल (राजद) केर राष्ट्रीय अध्यक्ष पद पर अपन नामांकन दाखिल कयलनि अछि। लालू यादव राजद कार्यालय पहुँचलाक बाद राष्ट्रीय अध्यक्ष पदक लेल नामांकन दाखिल कयलनि। ई तय मानल जा रहल अछि जे ओ फेर राजदक राष्ट्रीय अध्यक्ष बनताह।
ई नामांकन राजद 2025-2028 केर संगठनात्मक सत्रक लेल कएल गेल अछि। राबड़ी देवी, तेजस्वी यादव, अब्दुल बारी सिद्दीकी, मीसा भारती सहित राजदक बहुत रास वरिष्ठ नेता लालू यादवक नामांकन दाखिल करय केर समय मौजूद छलाह। लालू यादव राजद पार्टीक गठनक बादसँ पार्टीक अध्यक्ष छथि।
बिहारक पूर्व उपमुख्यमंत्री तेजस्वी यादव एहि अवसर पर पत्रकार सभसँ बात करैत कहलनि जे लालू यादव पार्टीक राष्ट्रीय अध्यक्ष पद पर नामांकन दाखिल कयलनि। लालू यादवक नामांकन पर पार्टीक सभ नेता कार्यकर्ता खुशी व्यक्त कय रहल छथि। ओ १२ बेर पार्टीक राष्ट्रीय अध्यक्षक रूपमे काज कय चुकल छथि । ई 13म बेर अछि जे ओ अपन नामांकन दाखिल कयलनि अछि। हम सब एहि बातसँ खुश छी।
ओ दावा कयलनि जे एहि बेरक विधानसभा चुनावमे लालू यादवक नेतृत्वमे हम सब जीतब। एहि ठाम पटलीपुत्रक सांसद मीसा भारती कहलनि जे लालू यादव राजदक प्रदेश कार्यालयमे राष्ट्रीय अध्यक्ष पद लेल अपन नामांकन दाखिल कयलनि अछि। आगू जे प्रक्रिया अछि ओ पूरा भऽ जाएत।
जनतबक अनुसार एखनि धरि लालू यादवक खिलाफ दोसर कियो नामांकन नहिं दर्ज कयलक अछि, जाहि कारण निश्चित मानल जा रहल अछि जे ओ एक बेर फेर राजदक राष्ट्रीय अध्यक्ष सर्वसम्मतिसँ बनताह। पार्टीक वरिष्ठ नेता अब्दुल बारी सिद्दीकी पहिनेसँ साफ कऽ देने छलाह जे लालू यादव अगिला राष्ट्रीय अध्यक्ष हेताह। कहल गेल जे राजद एकर आधिकारिक घोषणा 5 जुलाई कए करत। राजदक राष्ट्रीय कार्यसमितिक बैसार 5 जुलाईकेँ होबयवाला अछि।
