बिहार विधानसभा चुनावकें देखैत राजदमे कयल गेल नियुक्तिमे सामाजिक समीकरण पर विशेष ध्यान देल गेल अछि। एहिसॅं चुनावमे कतेक फायदा होएत से परिणाम बताओत।
लालू प्रसाद यादवक नवका टीम शनिदिन तैयार भऽ गेल। टीममे चारिटा राष्ट्रीय उपाध्यक्ष बनाओल गेल अछि। लालू यादवक पत्नी आ पूर्व मुख्यमंत्री राबड़ी देवीकें पार्टीक राष्ट्रीय उपाध्यक्ष बनाओल गेल अछि। पूर्व प्रदेश अध्यक्ष जगदानंद सिंहकें सेहो राष्ट्रीय उपाध्यक्ष बनाओल गेल अछि। मुसलमान आ दलित समुदायकें सेहो जगह भेटल अछि।
एकर अलावा महबूब अली कैसर आ उदय नारायण चौधरीकें सेहो पार्टीक राष्ट्रीय उपाध्यक्ष बनाओल गेल अछि। चारिटा राष्ट्रीय उपाध्यक्षमे सॅं एकटा लालू परिवार (यादव), दोसर उच्च जाति (राजपूत), तेसर मुसलमान आ चारिम दलित समुदायक छथि।
अब्दुल बारी सिद्दीकीकें पार्टीक राष्ट्रीय प्रधान महासचिव बनाओल गेल अछि। सुनील कुमार सिंह एक बेर फेर पार्टीक कोषाध्यक्ष बनताह। १२ राष्ट्रीय महासचिव आ १० सचिव नियुक्त कएल गेल अछि । राबड़ी देवी आ उदय नारायण चौधरी सेहो पहिने राष्ट्रीय उपाध्यक्ष छलाह। जगदानंद सिंह आ महबूब अली कैसर पहिल बेर राष्ट्रीय उपाध्यक्ष बनल छथि।
जय प्रकाश नारायण यादव, डॉ. नीलोहित दास (पूर्व एम.ए.), भोला यादव, ललित कुमार यादव (विधायक), कुमार सर्वजीत (विधायक), सैयद फैसल अली (एमएलसी), अभय सिंह (झारखंड), सुखदेव पासवान, सुशीला मोराले, अनु चक्को (केरल), अलख निरंजन उर्फ बिनु यादव, रेणु कुशवाहा महासचिव बना देल गेल अछि।
जखनिकि सचिवक नाममे यदुवंश कुमार यादव, लाल रत्नाकर, भारत भूषण मंडल (विधायक), कार्तिकेय कुमार सिंह (एमएलसी), विजय वर्मा (मधेपुरा), संतोष कुमार जायसवाल (दिल्ली), संजय ठाकुर (मुजफ्फरपुर), राजेन्द्र राम (पूर्व विधायक), स्वीटी सिमा हेम्ब्रम (पूर्व विधायक), सुरेंद्र राम (एमएलए) शामिल छथि। बिहार विधानसभा चुनावकेँ देखैत नियुक्तिमे सामाजिक समीकरण पर विशेष ध्यान देल गेल अछि।
राजदक रुख मजबूत अछि मुदा एहिसॅं चुनावमे कतेक फायदा होएत से बादमे परिणामसॅं पता चलत।
