राउज एवेन्यू कोर्ट लैंड फॉर जॉब घोटाला मामिलामे लालू प्रसाद यादव, तेजस्वी यादव आ तेज प्रताप यादव सहित सभ नौ अभियुक्तकेँ जमानत दऽ देलक अछि। एहि मामिलामे मीसा भारतीकेँ पहिनेसँ जमानत भेटि चुकल अछि।
दिल्लीक राउज एवेन्यू कोर्ट लैंड फॉर जॉब मामिलामे सभ नौ अभियुक्तकेँ एक लाखक मुचलका पर जमानत देलक अछि। दिल्ली राउज एवेन्यू अदालत लालू, तेजस्वी, तेज प्रताप यादव आ अन्य अभियुक्तकेँ जमानत दैत कहलक जे हुनका सभपर बिना गिरफ्तारीक आरोपपत्र दाखिल कयल गेल छल। अदालत प्रत्येक अभियुक्तकेँ एक लाख टाकाक निजी मुचलका पर जमानत देलक। अदालत सभ अभियुक्तक पासपोर्ट सरेंडर करय लेल कहलक अछि। पासपोर्ट सरेंडर कयलाक बाद लालू यादव, तेजस्वी आ तेज प्रताप जमानत बांड भरबाक लेल पहुँचलाह।
ईडी तेज प्रतापकेँ आरोपी नहिं बनौने छल। पूर्व रेल मंत्री लालू प्रसाद यादव, बिहारक पूर्व उपमुख्यमंत्री तेजस्वी यादव आ तेज प्रताप यादव पर सरकारी नौकरी देलाक बाद जमीन लेबाक आरोप अछि। ईडीक आरोपपत्रक संज्ञान लैत अदालत लालू यादव आ नौ गोट आन लोककेँ अदालतमे उपस्थित होयबाक लेल सम्मन जारी कयने छल। यद्यपि ईडी तेजप्रताप यादवकेँ आरोपपत्रमे आरोपी नहि बनओलक, मुदा अदालत तेज प्रताप यादवकेँ सम्मन जारी करैत कहलक जे तेज प्रताप यादव सेहो लालू यादव परिवारक सदस्य छथि आ धनशोधनमे हुनक भूमिकासँ इनकार नहिं कयल जा सकैत अछि।
पदक दुरूपयोगक आरोप
संज्ञान लैत न्यायालय कहलक जे पैघ संख्यामे भूमि हस्तांतरण भेल छल। यादव परिवार पदक दुरुपयोग कयलक। कोर्ट कहलक जे जमीन यादव परिवारक नाम पर हस्तांतरित कयल गेल छल। लैंड फॉर जॉब मामिलामे पहिल बेर कोनो अदालत तेज प्रताप यादवकेँ सम्मन जारी कयलक अछि। १८ सितंबरकेँ राउज एवेन्यू कोर्ट ईडीक आरोपपत्रपर सम्मन जारी कयलक। लालू यादव पहिने चारा घोटालामे जेलक सजा काटि चुकल छथि।