वक्फ सुधार बिलक विरुद्ध ऑल इंडिया मुस्लिम पर्सनल लॉ बोर्ड आ देशभरिक प्रमुख धार्मिक आ सामाजिक मुस्लिम संगठन सभ बुधदिन पटनाक गर्दनीबागमे धरना देलक। एहि कार्यक्रममे विभिन्न राजनीतिक दलक लोकसभ सेहो पहुँचल। राष्ट्रीय जनता दलक अध्यक्ष लालू यादव आ विधानसभामे विपक्षक नेता तेजस्वी यादव सेहो धरना स्थल पर पहुँचि संगठन सभक पुरजोर समर्थन कएलाक संग बिलक विरोध करबाक बात कयलनि।
एहि विरोधमे इमारत-ए-शरिया जेकाँ संगठनक संग-संग राष्ट्रीय जनता दल (राजद) केर नेता सभ सेहो शामिल भेलाह।
बिहारक पूर्व मुख्यमंत्री लालू यादव आ तेजस्वी यादव केन्द्र सरकारक एहि बिल केर असंवैधानिक ठहरबैत कहलाह जे हम आखिरी दम धरि एहि बिलक विरोध करब। ई बिल मुसलमानक अधिकारक हनन करय वला बिल अछि।
तेजस्वी यादव लालू यादव दिसि इशारा करैत कहलनि जे एहि उम्रमे ई एतय आयल छथि, ई बतबैत अछि जे ई एही बिलक कतेक विरोधमे छथि। तेजस्वी यादव कहलनि जे हमर नेता लालू यादव अहाँक संग ठाढ़ होएबाक लेल धरना स्थल पर आएल छथि। चाहे हमर पार्टी सत्तामे होय वा नहि, मुदा हम सभ ई बिलकेँ विरोध करैत रहब।
ओ कहलनि जे विपक्ष बुध दिन विधान सभा आ विधान परिषदमे वक्फ संशोधन बिलक विरोध कएलक। हम सभ एहि बिलकेँ गैर संवैधानिक आ अलोकतांत्रिक मानैत छी। किछु लोक देशकेँ तोड़बाक साजिश करैत अछि मुदा हमर पार्टी एहि कानूनकेँ रोकबाक लेल हर संभव प्रयास करत।
एही धरनामे विभिन्न मुस्लिम संगठनसँ जुड़ल लोक सेहो शामिल भेल छलथि। धरना स्थल पर पहुँचल लोक सभ भाजपा सहित एनडीएक ओहि राजनीतिक दल केर खिलाफ सेहो नाराजगी जतौलक, जे बिलकेँ समर्थन कएलक।
