लोकसभा चुनाव खतम होइत अपराधी लोकनि पुलिसकेँ चुनौती देलनि अछि। मधुबनीमे निडर अपराधी एकटा कपड़ा व्यवसायीक घरमे डकैतीक भयावह घटना कयलक । ई घटना भैरवस्थान थाना क्षेत्रक खैरा तिलई गामक अछि। कपड़ा व्यवसायी बिनोद पंजियार आ हुनक पत्नी आशा देवीकेँ सेहो लुटेरा लोहाक रॉडसँ पीटि देलक। पुलिस रातिमे सूचना पर पहुँचल आ आगूक कारवाई कयल जा रहल अछि। लुटेराक पहिचान एखन धरि नहिं भेल अछि। पुलिस लगपासक क्षेत्रमे छापा मारबाक बात कऽ रहल अछि। कहल जा रहल अछि जे बृहस्पतिदिन राति लगभग १२-१ बजे भैरवस्थान थाना क्षेत्रक खैरा तिलई गामक खैरा हाई स्कूल चौक लग १२ बेखौफ नकाबपोश अपराधी एकटा कपड़ा व्यवसायीक घर पर घुसि गेल। नकाबपोश अपराधी परिवारक सभ सदस्यकेँ बंधक बना लेलक आ घरमे राखल १२ लाख टाका, लगभग १२ भरिक सोनाक गहना सहित लगभग २५ लाख टाकाक सम्पत्ति लूटि लेलक। एहि दौरान विरोध कयला पर अपराधी परिवारक सभ सदस्यकेँ सेहो पीटि देलक। घटनाक सूचना भेटैत झंझारपुरक एसडीपीओ पवन कुमार, झंझारपुर पुलिस निरीक्षक बी के ब्रजेश, एसएचओ सुनील कुमार झा आ आसपासक थानाक पुलिस घटनास्थल पर पहुंचि जाँच शुरू कऽ देलनि। एसडीपीओ पवन कुमार बतौलनि जे मधुबनीक भैरबस्थान थाना अन्तर्गत काको पंचायतक खैरा गाममे एकटा कपड़ा व्यवसायीक दोकान घरमे आठ-दस सशस्त्र अपराधी २५ लाख टाकाक डकैती कयलक। ई घटना बृहस्पतिदिन राति १२ बजेसँ १ बजे केर बीच भेल छल।
