बृहस्पतिकेँ लेह एपेक्स बाॅडी आ क्लाइमेट एक्टिविस्ट सोनम वांगचुक द्वारा ७ अप्रैलकेँ चीन सीमा दिस मार्च करबाक घोषणा कयलाक बाद लद्दाखमे आन्दोलन तेज भऽ गेल।
जलवायु कार्यकर्ता वांगचुक पर्यावरण आ क्षेत्रक लोकक हितक रक्षाक लेल सीमा दिस कूच करबाक निर्णयकेँ “विरोधक गांधीवादी तरीका” कहलनि अछि।
लेहक शीर्ष निकाय लद्दाखकेँ राज्यक दर्जा देबाक लेल आ पर्यावरण संरक्षणक लेल एहि क्षेत्रकेँ संविधानक ६म अनुसूचीमे शामिल करबाक लेल आन्दोलन कऽ रहल अछि।
प्रदर्शनकारी लोकनि चलि रहल भूख हड़ताल जारी रखबाक निर्णय लेलनि अछि। लेह एपेक्स निकाय कहलक जे एकर बाद महिला, युवा, धार्मिक नेता आ बुजुर्गसभ द्वारा कतेको भूख हड़ताल कयल जायत।
७ अप्रैलक विरोध मार्चकेँ चीनक सीमा चांगथांग धरि बढ़यबाक प्रस्ताव अछि।
नेता सभ कहलनि “ई गाँधीजीक दांडी मार्च जकाँ होयत।”
जलवायु कार्यकर्ता वांगचुक आरोप लगओलनि अछि जे पश्मीना ऊनक उत्पादनक लेल प्रसिद्ध चांगथांग चारागाहकेँ अपन जानवर बेचबाक लेल मजबूर कयल जा रहल अछि। उद्योगपति लोकनि अपन संयंत्र लगयबाक लेल २०,००० एकड़सँ बेसी चारागाह भूमि लऽ लेलक अछि।
वांगचुक कहलनि “हम अपन लोकक रोजी-रोटी आ विस्थापनक दाम पर सौर ऊर्जा नहिं चाहैत छी।” ओ भाजपा पर आरोप लगओलनि जे ओ लद्दाखक जनतासँ कयल गेल वादासँ मुकरि गेल अछि।
ओ कहलनि “जखन केंद्रीय गृह मंत्रालय ४ मार्च केँ हमर माँग केर खारिज कऽ देलक तखन हमरा झटका लागल। हम अपन अधिकार आ वायदा केर पूरा करबाक मांग कए रहल छी। संसदीय चुनावक घोषणा भऽ गेल अछि आ भाजपा फेरसँ जनतासँ वादा कऽ रहल अछि, मुदा आब एहि पर के विश्वास करत ?”
गौरतलब अछि जे भाजपा उम्मीदवार जामयांग त्सेरिंग नामग्याल २०१९ मे लद्दाख लोकसभा सीट जीतने छथि।
