मिथिला क्षेत्रीय झारखण्डक साहिबगंजमे पछिला पाँच दिनसँ गंगामे आयल बाढ़ि आओर गम्भीर रूप लऽ सकैत अछि। बिहारक कोसी बैराजसँ ६.८१ लाख क्यूसेक पानि छोड़लासँ शनिदिन गंगाक जलस्तर बढ़बाक सम्भावना छल। साहिबगंज जिला प्रशासन दियारा क्षेत्रमे रहयवला जनसंख्याकेँ सतर्क कऽ देलक अछि। प्रशासन तटीय क्षेत्रसँ लोकसभकेँ सुरक्षित स्थानपर निकालबाक लेल कतेको नाव प्रदान कयलक अछि।
साहिबगंजक उपायुक्त हेमंत सती कहलनि जे जिला प्रशासन द्वारा स्थापित बाढ़ि राहत शिविरमे लोकक लेल व्यवस्था कयल गेल अछि। शनिदिन भोरमे साहिबगंजमे गंगा नदीक जलस्तर २७.९५ मीटर नापल गेल। ई खतराक निशानसँ ऊपर अछि। आब दुपहरिया १२ बजे सुपौलक वीरपुर बैराजसँ पानि छोड़लाक बाद जलस्तर बहुत बढ़त। लोकसभसँ अपील कयल गेल अछि जे ओ गंगा नदीक लग नहि जाय आ सभ सुरक्षा उपाय अपनाबय।
२२ सितंबरेसँ गंगामे बाढ़िक स्थिति अछि। राजमहल, उधवा, बड़हरवा आ तालझारी प्रखंडक ५०सँ बेसी गाम जलमग्न भऽ गेल आ ३,००० सँ बेसी लोक अपन घर छोड़ि लगपासक क्षेत्र आ शिविरमे शरण लेलक अछि। बाढ़िक पानिसँ दूटा लोकक मृत्यु भऽ गेल। शुक्रदिन कम बरखाक कारण जलस्तर घटि रहल छल, मुदा आब कोसीसँ आबयवला पानिक कारण चुनौती पैघ भऽ गेल अछि।
जिला मुख्यालयमे बाढ़ि नियंत्रण कक्ष सेहो स्थापित कयल गेल अछि। नियंत्रण कक्ष द्वारा पाँचटा नम्बर जारी कयल गेल अछि, जकरा आपातकालमे कोनो समय सम्पर्क कयल जा सकैत अछि।
एम्हर बाढ़िक पानि उतरलासँ साहिबगंजक कतेको क्षेत्रमे डाइरियाक प्रकोप देखल जा रहल अछि। स्वास्थ्य विभागकेँ एहि बारेमे सतर्क कऽ देल गेल अछि आ प्रभावित क्षेत्रमे आवश्यक चिकित्सा उपाय करबाक निर्देश देल गेल अछि।
