बिहारमे विशेष गहन संशोधन (एसआईआर) केर संबंधमे राजनीतिक दलक बीच कड़ा बयानबाजी भऽ रहल अछि, मुदा भारत निर्वाचन आयोग मतदाताक प्रति अपन प्रतिबद्धता दोहरा रहल अछि। आयोग बिहारमे जारी मतदाता सूचीक मसौदाक बारेमे स्पष्ट कयलक अछि जे एहि सूचीसँ कोनो पात्र मतदाताकेँ बाहर नहि राखल जाएत आ नहि कोनो अयोग्य व्यक्तिकेँ शामिल कयल जाएत।
ईसीआई बिहारमे विशेष गहन संशोधनक तहत 1 अगस्तकेँ मतदाता सूचीक मसौदा जारी कयलक अछि। आयोग सब राजनीतिक दल आ मतदातासँ अपील कयलक अछि जे ओ एहि सूचीक जाँच करथि आ दावा आ आपत्ति दर्ज करथि, जाहिसँ कोनो पात्र मतदाताकेँ बाहर नहि राखल जाए आ कोनो अयोग्य मतदाताकेँ शामिल नहि कयल जाए।
ईसीआई एकटा बयानमे कहलक अछि जे एखनि धरि कोनो राजनीतिक दल एकोटा दावा वा आपत्ति नहि देलक अछि। चुनाव आयोग बेर-बेर कहि रहल अछि जे कोनो पात्र मतदाता एहि सूचीसँ बाहर नहि रहत आ नहि कोनो अयोग्य व्यक्तिकेँ शामिल कयल जाएत। जँ किनको कोनो आपत्ति अछि तँ ओ अपन दावा आ आपत्तिकेँ 1 अगस्तकेँ जारी मतदाता सूचीक मसौदामे दर्ज कय सकैत छथि।
चुनाव आयोगक अनुसार बिहारमे विशेष गहन संशोधन (एसआईआर) केर तहत 1 अगस्तकेँ जारी मतदाता सूचीक मसौदा पर पहिल 5 दिन (1 अगस्तकेँ 3 बजेसँ 5 अगस्तक 3 बजे धरि) मे कोनो राजनीतिक दलक दिसिसँ कोनो दावा वा आपत्ति दर्ज नहि कायल गेल अछि।
मुदा पछिला पांच दिनमे पात्र मतदाताकेँ सूचीमे शामिल करय आओर अयोग्य मतदाताकेँ हटाबय लेल 2864 दावा वा आपत्ति आयल अछि। एकर अलावा १८ साल वा ओकरासँ बेसी उम्रक नव मतदातासँ १४,९१४ ‘फॉर्म-६ आ घोषणापत्र’ भेटल, जकर निपटारा भऽ जायत।
