पहलगाम आतंकवादी हमला पर कांग्रेस, समाजवादी पार्टी सहित समस्त विपक्षी दल इंटेलिजेंस विफलता पर प्रशन उठाय रहल अछि। एही प्रश्नक बीच कांग्रेसक वरिष्ठ नेता आ सांसद शशि थरूर एकटा महत्वपूर्ण बयान देलनि अछि।
तिरुवनंतपुरममे रविदिन (27 अप्रैल, 2025) केँ पहलगाम हमलाक बारेमे थरूर कहलनि जे जाहिर अछि जे पूर्ण रूपसँ पुख्ता खुफिया जानकारी नहि रहल। जरूर किछु फेलियर भ’ गेल। ओ आगू कहलनि जे मुदा हमरासभ लग इजरायलक उदाहरण सेहो अछि, जकर इंटेलिजेंस एजेंसीकेँ दुनियामे सभसँ पावरफुल मानल जाइत अछि आ ई सभ मानैत अछि जे हुनका लग सभसँ आधुनिक तकनीक अछि।
ओ आगु कहलनि जे एहि सबहक बावजुद इजरायलमे 2 साल पहिने 7 अक्टूबरकेँ आश्चर्यजनक रूपसँ हमला भेल। हमर मानब अछि जे जाहि तरिकासँ इजरायल युद्धक अंत धरि जवाबदेही केर माँग करबाक प्रतीक्षा कय रहल अछि, तहिना हमहुँ सोचि रहल छी जे वर्तमान संकटकेँ देखबाक चाही आ तकर बाद सरकारसँ जवाबदेही केर माँग करय केर चाही।
शशि थरूर कहलनि जे कोनो देश लग कखनो 100 प्रतिशत पुख्ता खुफिया जानकारी नहि होइत अछि। हम कखनो बहुतो एहेन आतंकवादी हमलाक बारेमे नहि जानि सकब जे सफलतापूर्वक विफल कयल गेल। हमरा केवल ओहि हमलाक बारेमे जनतब भेटैत अछि जकरा विफल करबामे हम असफल भऽ गेल छी। ई कोनो देशमे सामान्य बात अछि। हमर सहमति अछि जे विफलता भेल, मुदा एखनि हमर मुख्य ध्यान ओहि पर नहि होयबाक चाही। कांग्रेस सांसदक मान्यता अछि जे हमरा एखनि कोनो प्रश्न नहि उठेबाक चाही।
कांग्रेस नेता पाकिस्तान पीपुल्स पार्टीक अध्यक्ष बिलावल भुट्टो जरदारीक बयान पर प्रतिक्रिया देलनि आ कहलनि जे इ केवल भड़काऊ बयानबाजी अछि। जँ खून बहत तँ इ संभवतः हमरासँ बेसी हुनका दिसि बहत। ओ कहलनि जे पाकिस्तानक खिलाफ हमरा तरफसँ कोनो साजिश नहि, मुदा जँ ओ किछु करैत अछि तँ ओकरा जवाबक लेल तैयार रहय पड़त।
