बिहारक मुजफ्फरपुर जिलासँ एकटा चौंकाबय वाला मामिला सामने आयल अछि, एतय दहेजक नाम पर विवाहित महिलासँ किडनी मांगल गेल अछि।
आरोप अछि जे पहिने सासु-ससुर दहेज लेल पाइ आ बाइक मांगलक। एकर बाद महिला पर दबाव बनौलक जे ओ अपन किडनी अपन पतिकेँ देथि। पीड़ित दीप्ती आब अपन मायकेमे रहैत छथि। महिला थाना पुलिस एहि मामिलाक जांच कs रहल अछि।
प्राप्त जानकारीक अनुसार दीप्ती महिला थानामे शिकायत दर्ज करौने छथि। दीप्ती कहैत छथि जे विवाहक शुरुआत दिनमे सब किछु ठिक छल, मुदा किछु मासक बाद सासुर वालाक व्यवहार बदलि गेल। ओ सभ दीप्ती पर दबाव बनाबय लागल जे अपन माता-पिताक घरसँ पाइ आ बाइक आनबाक लेल। जखनि ओ विरोध कयलनि तs हुनकर सासुरक लोक दीप्तीकेँ मानसिक रूपसँ प्रताड़ित करय लागल।
पीड़ित दीप्तीक आरोप अछि जे विवाहक करीब दू साल बाद हुनका पता चलल जे हुनकर पतिकेँ एकटा किडनी खराब अछि। एकर बाद ओकर सासु-ससुर ओकरा धमकी देलक। आरोप अछि जे सासुरक लोक कहलक जे जँ दहेज नहि आनि सकैत छी तखनि अपन एकटा किडनी पतिकेँ दान क’ दियौक। पहिने तऽ ई बात मजाक लागल, मुदा धीरे-धीरे एहि लेल दबाव बढ़ि गेल। जखनि दीप्ती अपन किडनी दान करबासँ स्पष्ट रूपसँ मना कs देलथि तs हुनका मारि-पीट कs घरसँ बाहर निकालि देल गेल।
एकर बाद दीप्ती अपन नैहर जा कए महिला थानामे शिकायत दर्ज करौलनि। पुलिस दुनू पक्षके फोन कs समझौता करबाक प्रयास कयलक, मुदा मामिला ठीक नहि भेल। एहि मामिलामे पति सहित ससुराल दिसिसँ चारि गोटेकेँ आरोपी बनाओल गेल अछि।
ग्रामीण एसपी विद्यासागर केर अनुसार मिठनपुरा थाना क्षेत्रक एकटा महिला अपन पति आ सासुर पर गंभीर आरोप लगौलनि अछि। महिला थानामे मामिला दर्ज भs गेल अछि। मामिलाक जांच जारी अछि।
